SPAOH: Pengudah ngembuan penanggul pengelama dua taun, diatu tanah Hak Adat Bumiputera (NCR) Tanjong Sebekut deka digazet kena 30 April.

Pekara tu udah padahka Menteri Penatai Asal enggau Rampa Menua, Dato Sri Douglas Uggah Embas rambau ti ngulu randau begulai enggau rayat ti bempu tanah nya, ari Tanjung Assam, Bungin, Spaoh enggau Balingan diatur ba Spaoh, apin lama ti udah.

Sama bisi datai ngulu randau nya, Menteri Muda Pengintu Pengelantang, Robert Lawson Chuat enggau Pemesai Tadbir (Tanah) Opis Tanah enggau Survei Bagi menua Betong, David Laeng.

Dato Sri Douglas Uggah, ti mega nyadi Kaban Parlimen sitak Betong madahka, kandang menua Tanjung Sebekut udah dikemendarka nyadi tanah NCR berengkah Ogos, 2010, tang ngembuan penanggul teknikal ti ngelaunka proses gazet tanah ba endur nya.

“Kitai deka ngemendarka kandang menua nya nyadi tanah NCR gunasama sereta nyimpan semua. empat buah nama kampung, iya nya Kampung Tanjung Assam, Bungin, Spaoh enggau Balingan,” ku iya.

Dato Sri Douglas madahka, diatu ,tanah nya nyadika siti peluang ekonomi ngagai rayat diau ba genturung pendiau nya dikena nyungkakka tikas pemanah penatai pemisisi sida iya.

“Aku enggau pengari rayat ari Betong, nyengkaum Robert Lawson deka berunding ngiga chara nyendiaka peluang ekonomi, nyengkaum ngatur industri dagang pengawa betanam enggau betupi,” ku iya. Beserimbai enggau pengerami randau nya, iya ngemendarka  agih penyampau RM200,000 dikena ngaga jematan gantung ba Spaoh dikena nganti projeknya suba ti diketuka enda lama, ketegal penanggul tanah endur ngaga iya.

(Sumber: Utusan Sarawak, 4 April 2012)