Orang ke ngempu tanah NCR ngenggaika tanah sida disukat berindik ari penyarut entara: Tengah

Dikarang Chris Bishop enggau Jacqueline David

KUCHING: Penemu ti madah, mayuh orang ke ngempu tanah temuda bansa asal (NCR) ngenggaika tanah sida disukat nengah Seksyen 6, Atur Tanah nengeri, nya enda amat, Ku Menteri Pengatur Pemansang Pengeraja Asal enggau Rampa Menua
II Datuk Awang Tengah Ali Hassan.

“Nitihka rikut Opis Tanah enggau Penyukat (JTS), sepenyampau 447 peminta bisi diterima ari serata Sarawak ngambika tanah NCR disukat nengah Seksyen 6 Atur Tanah nengeri.

“Rikut ari opis JTS mega mandangka kes ti mantah pengawa nya nyadi ketegal penyarut entara tanah orang ke besendi tauka berimbai ke empai diputar enggau manah,” ku iya.

Iya mansutka penerang lebuh nimbal tuduh ari kaban Kunsil Nengeri (PKR — Krian) Ali Biju ti madah mayuh orang ke ngempu tanah enggai tanah NCR sida disukat kelingi nengah Seksyen 6 Atur Tanah nengeri.

Ku iya, bisi dua chara tanah NCR disukat iya nya nyukat kelingi adan tanah ti diambu komuniti sebengkah genturung pendiau lalu dikelai nyadi ‘Rizab Gunasama’ bansa Asal nengah seksyen 6 Atur Tanah nengeri.

Iya kedua iya nya nyukat lot seseiku orang ke ngempu tanah ngambika tau diberi surat pala tanah nengah seksyen 18 Atur Tanah nengeri.

“Dua bengkah atur tu benung chakah dipejalaika perintah nyukat tanah NCR ngambika tau dikemansang sereta mulaika penguntung ngagai rayat bansa asal.

“Lot seseiku orang ke ngempu tanah mega disukat sereta surat pala tanah diberi nengah seksyen l8 AturTanah nengeri ngambika tau dikena bejalaika pengawa bumai bekebun sereta pia mega endur ngentakka rumah,” ku iya.

Surat pala tanah nya nyadi bukti sah ti deka ngintu hak orang bansa asal ti ditulis dalam Atur Tanah nengeri, tandu iya.

Iya mega madah, nyukat kelingi nengah seksyen 6 ulih diaduka enggau jampat tang pengawa nyukat lot seseiku orang bempu tanah negah seksyen 18 mar agi diadu lalu deka begunaka awak ti panjai ketegal orang ti ngempu tanah berimbai patut setuju enggau entara tanah sedua iya.

(Sumber: Utusan Borneo 22 Mei 2012)