Tanah pesaka kenyau ari 1958 disukat

SERIAN:   Rayat ke bempu Tanah Hak Adat Bumiputera (NCR) di Kampung Tian Sekawan udah madahka sida lantang ati laban tanah pesaka ti diempu sida ngelama tu kenyau ari taun 1958 udah disukat lalu udah nerima surat pala tanah ari tulung Gerempung bansa Dayak Bidayuh (DBNA) enggau Opis Tanah enggau Survey (JTS).

Kaban Kunsil Negeri (ADUN) N15 Muara Tuang Dato Sri Haji Mohd Ali Mahmud madahka, isu bekaul enggau Tanah Adat (NCR) selalu nyadi ‘isu hangat’ parti penyakal, lebih agi maya pengawa bepilih besai.

Nitihka jaku iya, diatu surat pala tanah udah dikeluarka, ari tulung DBNA enggau JTS.  Udah tu ila penemu pasal tanah NCR ulih diputarka enggau manah.

“Aku muji raban bansa Bidayuh laban sida chukup begerempung ati.  Pemanah kaul ati baka ti ditunjukka rayat Bidayuh di Kampung Tian Sekawan patutu nyadi teladan ngagai rayat di tempat bukai.  Pemanah kaul ati nya asil ari gerempung sereta pemanah kaul enggau bala tuai ti praktif dalam pengawa ngemenataka penduiau rayat,” ku iya.

Iya bejaku munyi nya ba pengerami nyerahka Dokumen Estrak DBNA /LD/02-Tanah Adat (NCR) Kampung Tian Sekawan ditu malam hari enam tu tadi.

Ba pengerami nya, bisi 350 iku rayat nerima dokumen ekstrak tanah sida.  Ari semua nya, 100 iti lot digaga nyadi kapung tradisi lalu 258 iti agi lot diguna nyadi tanah umai enggau kebun ari semua pemesai 842 ekar tanah.

Mohd Ali minta rayat di menua t uterus nyukung perintah Barisan Nasional (BN) ke udah ditemu mujur ngemajuka menua sereta negeri tu kenyau ari 40 taun lalu.  Sukung rayat ngagai BN amat diguna maya pengawa bepilih besai (PRU) Ke13 ti deka diatur enda lama agi, lalu minta rayat nanag meri sukung ngagai penemu ti mutarbelitka fakta munyi ti ditaburka penyakal.

Iya madahka, pemansang ti diasaika rayat kemaya hari tu endang asil ari atur program pemansang ti ngemeranka pengelantang enggau pengelikun pengidup rayat di menua tu, rayat ti datai ari mayuh raban bansa enggau agama.  Diatu rayat udah chukup dalam penemu politik lalu nemu ni ke manah sereta ni ti jai kena nentuka pemansang menua ulih diteruska.

“Perintah BN selalu ngemeranka pekara bekaul enggau pengawa besekula sereta ngangkatka tikas pengidup rayat.  Pemujur enda ulih datai sekelip mata,” ku iya sambil minta rayat anang kiruhka dawa sereta tuduh penyakal.

Ari penemu nya iya madahka chalon di deka dipaduka nyadi pengari BN ba sitak Parlimen P197 Kota Samarahan dalam pengawa bepilih besai PRU Ke-13 tu ila deka diambi ari anak asal dalam sitak nya, nitihka penemu Kepala Menteri Pehin Sri Haji Abdul Taib Mahmud ke nyadi Presiden Parti Pesaka Bumiputera Bersatu (PBB).

“Kitai patut anang ngira sapa ke nyadi chalon.  Pengawa kitai ti pemadu besai nya meri sukung ngagai chalon ti dipaduka ulih tuai parti,” ku iya.

Ba pengerami nya, iay ngemendarka geran Projek Mit Menua Pesisir  (MRP) ngagai Komiti Pemansang enggau Pengelikun Kampung (JKKK) Kampung Tian Sekawan kena sida ngatur aktiviti, meli kerusi, pekayan (uniform) RELA sereta enggau gerija beungkus RM9,500, sereta ngemendarka pengawa ngaga dinding pengadang semak gerija nya ungkus RM10,000 sereta balai raya RM15,000.

Semua datai nyempulang iya, Sapit Presiden DBNA Charlie Ungang, Tuan D.O. Samarahan Mohd Ainie Wahab enggau Tuai Raban Bansa Satas anak Mayar.

(Sumber:  Utusan Sarawak, 17 April  2012)