Ahmad ngelalau rayat enda nyadi ‘Mat Jenin’ti ka kaya tekenyit

BEKENU: Rayat ke diau di rumah panjai enggau paI an ngelingi mengeri enda nunda ulah ‘Mat Jenin’.

Kaban Parlimen (MP) Sibuti, Ahmad Lai Bujang ngelalau rayat ngambika bebendar ngemansangka tanah enggi sida.

“Anang semina ka nunda ulah ‘Mat Jenin’ ti deka ngulihka untung tekenyit tang nadai perambu deka ngemansangka tanah,” ku iya bejaku ba Pengerami Randau Inisiatif Baru Tanah Asal Adat Bumiputera (NCR) di Rumah Panjang (RH) Baie, Sungai Mamut, Bekenu kemari.

Nitihku jaku iya, ngemeratka pengawa nanam utai tanam tauka nyadi palan endur ngaga kilang ba tanah sigi ulih meri penguntung ke besai, tang taja pia, ukai bereti orang bukai sengapa ngalahka tanah sida.

“Nengah chara tu ila, nadai orang tau ngachau tauka ngeruga tanah kita,” ku iya.

Kelimpah enggau nya Menteri Muda Pemansang Ruang Bilik enggau Pelajar Anak Mit Rosey Yunus mega bejaku madahka semua rayat rumah panjai aruh meri kerejasama ngagai Opis Tanah enggau Survei (JTS) ngatur pengawa nyukat tanah NCR sida.

“Enti sema bisi bantah tauka belaya enggau pangan diri bekaul enggau tanah, pengawa raban opis JTS deka tejanggal kelimpah bekenaka masa ti panjai,” ku iya.

Nyerumba enggau nya mega, iya bisi ngerahka geran projek mit menua pesisir (MRP) RM3,000 ngagai Biro Indu RH Baie.

Dulu agi ari nya, raban JTS bisi ngatur licha ba RH Baie enggau RH Misoon bekaul enggau pengawa nyukat kelingi tanah NCR.

Sama bisi datai ba pengerami nya Tuai Rumah Baie Suka, Penghulu Sadi Mancha,
Penguasa JTS Miri Unus Tambi enggau Sapit Residen Miri Oyo Emang.

(Sumber:  Utusan Borneo, 01 Mac 2012)