KUCHING: Rayat menua tu sekali agi ditesau ngambika sama sampal datai mendingka forum Sukat Kelingi Tanah Asal Adat Bumiputera (NCR).

Forum tu diatur Saratok Update begulai enggau sebengkah gerempung ukai dikuasa perintah (NGO) ke diatur ba Rumah Andau, Sungai Bangkong, Kabo, Saratok kena 10 March, (Han Enam) tu.

Pengawa tu deka berengkah diatur ari pukul 1 lemai.

Nitihka penerang dianjung ngagai Opis Utusan Borneo Berita lban, bisi empat batang pekara deka dipejuraika ba forum nya ila. Antara empat batang pekara tu iya nya Asal enggau Reti NCR (cherita deka ditusui kenyau ari Sultan Brunei nyerahka Sarawak ngagai Rajah Brooke), Penanggul NCR ba Adat tauka Custom Law, pengawa nyukat NCR ngena Undang-undang Tanah Sarawak (Sekyen 6) enggau Meretika Provisional List (Balak enggau Joint Venture).

“Ba penemu aku, randau tu chukup manah laban raban panel ke bejuraika empat batang pekara nya endang orang bepeneleba sereta profesyenal nitihka Undang-undangTanah Sarawak enggau bepelasarka kes ke bisi nyadi ba kot.

“Nya alai, aku arap endar rayat kelebih agi ba sebelah menua Kaki Wong sama bela ulih ‘muka runding’ sereta ningaka penemu ari raban ke ngembuan pengelandik baka luyar bekaul enggau NCR,” ku seiku ari kaban komiti Saratok Update Andrew Paul.

Ku iya, forum ke diatur ba Rh Andau tu bejarit ari pengawa ke sebaka dipejalaika ba Hotel Grand Continental kena 25 Feb tu tadi.

Tegal nerima timbal ti manah, Saratok Update dipelabaka deka bejalaika forum tu ba serata menua Sarawak. Udah tu ila, raban tu merambu ngatur forum ba Sri Aman, Selangau enggau Bintulu.

Penerang ke silik bekaul enggau atur forum tu tau betelefon ngagai lumur 082-
612585.

(Sumber:   Utusan Borneo,  8 Mac 2012)