Nengah JTS perintah bejalaika atur ngambika semua tanah NCR di serata Sarawak disukat

Dikarang Chris Bishop

SERIAN:   Rayat nerima enggau andal ati pengawa perintah, nengah Opis Tanah enggau Penyukat  (JTS) ke bejalaika atur nyukat Tanah Asal Adat Bumiputera (NCR) serata Sarawak..

Menteri Pemansang Infrastruktur enggau Penyambung  Dato Sri Michael Manyin Jawong madah, kenyau ari taun 2007 nyentuk ke diatu, rayat bansa asal ke mayuh agi diau ba menua pesisir andal ati tanah NCR disukat.

“Tiga taun ke udah maya berengkah atur tu dipejalaika, pengawa tu enda tentu nerima timbal ke manah ari rayat.

“Sekeda enda tentu arapka pengawa nyukat ke dipejalaika JTS, tang diatu runding rayat udah berubah lalu nyukung pengawa nya,” ku iya.

Sepengudah tembu pengawa nyukat dipejalaika JTS, surat pala tanah deka disuaka ngagai orang bempu tanah, tandu iya.

Manyin mansutka jaku tiu lebuh dikerandau pemberita sepengudah nyuaka surat pala tanah NCR  ngagai rayat ke masuk dalam projek nanam sawit Salcra ba Balai Raya Kpg. Bunan Gega, Jalai Mongkos, Tebakang ditu, kemari.

Iya mega madahka perintah enda ngansak rayat ke enggai tanah NCR ke diempu sida iay disukat.

“JTS semina deka datai nyukat tanah NCR enti orang ke ngempu tanah nya setuju, kitai enda mejal orang ke ngempu tanah nerima atur tu.

“JTS mega semina deka bejalaika pengawa nyukat enti tanah nya chukup penerang lalu nadai penyarut,” ku iya.

Perintah nagit deka nembuka pengawa nyukat tanah NCR ba pengujung taun tu, tang ketegal bisi penanggul ba sekeda kandang endur pengawa tu deka terus dipejalaika ba taun ke deka datai, tandu iya.

“Sekeda kandang endur ba Serian baru berengkah disukat, pengawa nembuka atur nyukat tanah NCR deka dilanjarka ngagai taun ke deka datai,’ ku iya.

Ba kaul ke bukai, Manyin nyangkal dawa ke madah Dayak Bidayuh National Association (DBNA) beambi ulih ari pengawa nyukat tanah NCR bansa Bdiayuh ba Serian, Padawan sereta Lundu.

“DBNA semina bejalaika tanggung pengawa nentuka genap tanah NCR bansa Bdiayuh disukat sereta dikeluarka pala tanah.

“Enti rita didinga madahka DBNA beambi ulih ari pengawa tu, kami enda deka bejalaika pengawa nyukat ba kandang endur nya,” ku iya.

Raban DBNA ke ransing bejalaika pengawa tu kereja enggau peneka ati lalu enda minta gaji, tandu iya.

519 pala tanah udah disuaka ngagai 468 iku orang nerima ke mungkur tanah NCR ba pemesai 688.3 hektar ngelingi kandang endur Mongkos, Taee sereta Kedup sehari nya.

Sama bisi ngulu pengawa nya Kaban Kunsil Nengeri Kedup Martin Ben, Temenggung Robert Sulis Ridu, Sekretari Politik Kepala Menteri James David, Pemesai Salcra Henry Daris, Pemesai JTS Samarahan Abdul Khalid, raban orang gawa Salcra enggau sida ke bukai.

 (Sumber:  Utusan Borneo, 13 Disember 2011)