SARIKEI: Apin lama ke udah, Opis Tanah enggau Survei (JTS) benung enggau naka ulih nulung orang ke bisi tanah nyukat tanah sida lalu ba maya ke diatu bisi 48 endur di menua Sarawak udah digaset nyadi Communal Reserve Bansa Asal lalu 20 endur ke udah di gasetnya udah diberi ngagai tuai kampung tauka tuai rumah.

Menteri di Opis Kepala Menteri enggau Menteri Pengawa Khas, Tan Sri Datuk Amar  Haji Adenan Haji Satem madahka, Opis Tanah enggau Survei (JTS) pelilih menua Sarikei udah ngamatka pengawa ke nyukat tanah ngagai rayat lalu perintah endang enggau bebendar ngemujurka pengawa nulung rayat nyukat tanah NCR ke benung dipejalaika diatu.

“Pengawa meri pala tanah ba kandang menua Muara Payang di Sarikei ke nyengkaum 481 ektar pemesai enggau 9 buah rumah panjai endang ngamatka pengawa Opis Tanah enggau Survei (JTS) ke deka meri pala tanah.

“Ngambika pengawa nyukat tanah tu mujur dikereja, mensia mayuh ke diau di pelilih menuanya patut bekerejasama enggau orang ke nyukat tanah Opis Tanah enggau Survei (JTS) enggai nyukat tanah ke bisi penanggul sereta deka nyukat tanah ba endur bukai ke nadai penanggul” ku Adenan.

Iya mansutka jako tu ba Warta Seksyen 6 Kanun Tanah Negeri Bagi Sarikei di  Opis Tanah enggau Survei di Opis Jubli Mutiara empai lama ke udah.

Ba pengerami ke sama iya ngelalau bala tuai rumah ke bisi datai ba pengawa nyukat tanah sida iya ngambika penemu ti enda tentu terang entara sida iya ulih di atur enggau chara ke betul.

“Enti bisi Penanggul ke besai maya nyukat tanah tu, kitai anang ngasuh iya nyadi besai ngambika Opis Tanah enggau Survei (JTS) ulih ngemujurka tanggungjawab sereta bejalaika pengawa sida enggau lengkas lalu semua kitai bulih penguntung arinya, ku Adenan.

Kepala Opis Tanah enggau Survei pelilih menua Sarikei,  Ngu Tai Kong  madahka, kandang Muara Payang ke bisi pemesai rung 481 hektar nya kandang tanah NCR keterubah iya di Sarikei ke udah dikemendarka nyadi Tanah Communal Reserved Orang Asal nitihka Inisiatif Baru NCR ke guna raban bansa Iban lalu naka ke diatu bisi 9 buah rumah panjai nyereta pengawa nya.

“Jaku pemadah senentang tanah NCR nyadi tanah Communal Reserved Orang Asal nitihka Inisiatif Baru NCR nitihka Section 6 Tanah Negeri nyamin sereta ngemendarka orang ke ngempu tanah nitihka undang-undang pasal bempu tanah NCR sereta kuasa empu tanah NCR lalu ditentuka undang-undang adat raban bansa ke udah dikemendar.

“Ngena chara ke baka tu charut berebutka antara tanah oleh dikurangka laban pemendar ulih madahka enggau terang pemesai tanah ke udah di sukat lalu antara dipadah dulu ngagai orang ke empu tanahnya sebedau kandangnya dipadah nyadi nyadi Tanah Communal Reserved Orang Asal.

“Orang ke empu tanah ke udah minta tanah disukat mesti besabar nganti tanah sida disukat ba menua sida iya laban Opis Tanah enggau Survei agi ngiga chara ke manah ke nyukat tanah laban kandang tanah NCR besai di menua Sarawak” ku Ngu.  Iya mega ngelalu orang ke empu tanah NCR nganjung peminta sida ngena surat ngagai Opis Tanah enggau Survei jampat lalu sebarang sapa ke bisi penyarut senentang tanah diasuh ngatur iya ba mahkamah dulu.

Ku iya, ba maya ke diatu bisi 48 buah bidang tanah di sereta Sarawak udah dikemendarka nyadi Rizab Gunasama Bumiputera enggau 20 agi ari warta nya udah disuaka ngagai tuai kampung enggau tuai rumah.

Pengawa ke diatur Opis Tanah enggau Survei udah ngemendarka kandang Muara Payang nyadi Rizab Gunasama Bumiputera nitihka Inisiatif Baru NCR ke semina ulih diguna raban bansa Iban ke diau di Rumah Brandah Chundan, Rumah Jugah Banyah, Rumah Benang Pirang, Rumah Juan Buyu, Rumah Muli Nyantau, Rumah Gauning Lagau, Rumah Endan Minai, Rumah Pagan Labu enggau Rumah Libau.

Dua buah kandang menua di Jalai Pakan/Sesco enggau Jalai Pakan/Entabai sereta Sungai Ensiring di Julau enggau pemesai ba siti kandang urung 4,299 enggau 4,765 hektar hektar agi dalam proses deka meri pemendar.

Bisi enggau ba pengerami nya mega Residen Bagi Sarikei, Michael Dawi,  Sapit Director JTS, Sajeli Kipli enggau Pemesai Sitak Sarikei,  Abang Mohd Porkan Abg Budiman.

 (Sumber: Utusan Sarawak, 12 November 2011)