Kena mutarka penanggul ke seruran ngambu enggau betalatka entara tanah

Dikarang Judan Bungap

SIBU:  Penanggul ngambu enggau betalatka entara tanah ulih dikurangka agi nengah pengawa ngemendarka tanah adat bumiputera (NCR) nyadi Rizab Gunasama Bumiputera ari baruh Seksyen 6 Kanun Tanah Negeri.

Superintendent (Penguasa) Tanah enggau Survei Sibu, Peggy Ronin madah, atur tu engkeman alai mutarka penanggulnya laban bisi ngundan pemesai tanah iya ke udah disukat enggau nyemetak.

“Pekara tu mai pengelikun ngagai bala ke beempu tanah NCR laban udah dilis ba atur nya nyengkaum adat bansa,” pia ku iya madah Majlis Penyampaian Warta Seksyen 6 Kanun Tanah Negeri Bahagian Sibu.

Pengawa nya dipejadika Menteri Pekara Khas ba Opis Kepala Menteri, Tan Sri Datuk Amar  Adenan  Satem ba Dewan Kelab Melayu Kampung Nyabor ditu, kemari.

Ku iya nandu baru, naka ke diatu bisi 48 buah menua ba serata Sarawak udah digazet nyadi Rizab Gunasama Bumiputera lalu 20 iti ari nya disua ngagai Tuai Rumah tauka Ketua Kampung.

“Pengawa tu mandangka perintah ngamatka danji ngagai rayat ngambika tanah NCR semampai likun nadai penyarut nyadi ba bala ke beempu.

“Aku deka madah ngagai bala ke beempu tanah, Opis Tanah enggau Survei (JTS) benung gawa bebendar nyukat tanah NCR ba nengeri tu,” ku iya madah.

Ku Peggy, ngagai bala ke beempu tanah ti udah ngagai peminta nyukat pemesai tanah, iya ngarapka sida besabar nganti gintir diri.

“Pengawa nyukat bekena awak laban tanah NCR ba nengeri kitai besai. Kitai mega ngarapka sida ti bisi tanah anang laun nganjung peminta ngagai opis,” pia ku iya nerangka.

Kelimpah ari nya mega, iya ngarapka tanah ti bisi penyarut lebih agi bekaul enggau kut iya ke udah dipinta disukat meseti diputarka enggau ledngkas ngambika pengawa nyuka dipejalaika enggau lantang.

Bela bisi datai ngulu pengawa tu iya nya, Kaban Kunsil Nengeri (ADUN) Tamin, Joseph Mauh Ikeh, ADUN Ngemah, Alexander Vincent, ADUN Nangka, Dr Annuar Rapa’ee, enggau bala ke bukai.

(Sumber: Utusan Borneo, 10 November 2011)