SIBU:– Bantu ke disediaka perintah Barisan Nasional ngagai orang ke diau di menua pesisir sekeda ari pengawa perintah ke deka terus mantu ngangkatka tikas pengidup rayat ngambika enda dikungkung penyeranta.

Kaban Kunsil Nengeri Daro, Murni Suhaili madahka, enggau bantu ke udah diberi ngagai sida ke nerima lebih agi sida ke diau di menua pesisir terus deka ngangkatka tikas pengidup sida iya.

Iya ke pemadu beguna nya, rayat seruran bekerejasama enggau perintah enti deka meda bantu ke dipinta dikemendarka, ku iya bejaku lebuh ngelancharka Program Mantu Rumah kandang Sungai Lengan di Rumah Jawa anak Tangi, Sungai Lengan empai lama ke udah.

Bisi enam buah rumah panjai baru sereta 53 pintu rumah panjai ke deka diseruri ngena program nya di kandang Sungai Lengan.  Ba genap buah rumah baru, Opis Menteri Ngemajuka Menua Pesisir enggau Wilayah meri agih RM40,000 lalu genap pintu rumah panjai ke deka diseruri diberi agih penyampau RM12,000.

Sungai Lengan urung setengah jam ari Sibu enti ngena kerita ngunaka Jalai Tanjung Manis-Sibu lalu 20 minit ngena bot ari Jambatan Sungai Lengan.

Ku Murni, ba genap program nemuai ngagai rumah panjai di pelilih menua ke dijaga iya penanggul ngaduka rumah panjai selalu nyadi buah mulut lebuh berunding lalu orang ke diau di Sungai Lengan sigi endang untung laban bulih agih ke diberi perintah. 

Ngenang pasal bantu ke udah diberi nagai orang mayuh, iya ngarapka opis enggau ijinsi perintah ke besangkut paut ulih ngemujurka pengawa nya ngambika enda diberi dua kali di kandang DUN Daro ke bisi 60 buah rumah panjai.

Iya mega ngasuh Komiti Pemaju enggau Pengeikun Kampung (JKKK) muka akaun bank ngambika perintah ulih menagih ke udah dipinta. Tebal agi JKKK laun nerima agih MRP laban akaun sida iya enda aktif tauka nadai akaun, ku iya madah laban agi RM100,000 udah dikemendarka kena ngagai jalai nyambung ngagai rumah panjai di Sungai Lengan ari jalai besai Jalai Tanjung Manis-Sibu.

Ba pengerami nya Murni mega berandau enggau sida ke diau di Sungai Lengan senentang enggau pengawa nyukat tanah NCR, nyuaka surat pemendar ngaga enggau nyeruri rumah sereta bantu ngagai semilan iku orang ke timpang pendiau sereta seranta.

‘Aku ngarapka kita ke diau ditu ulih numbuhka komiti kena ngatur tanah NCR di kendang menua tu lalu berandau manah-manah enggau Opis Tanah enggau Survei,” ku iya.

SAO Haji Khalid Andong ke ngarika Pemesai Sitak Sibu enggau Tuai PBB Ranting Sungai  Sungai Lengan (Pampang Daro), Dee anak Tam mega bisi enggau.

 (Sumber:  Utusan Sarawak,  29 Oktober 2011)