Ngenataika peminta ngagai JTS ngambika tanah ulih disukat lalu diberi pala tanah nitihka atur Inisiatif Baru NCR

Dikarang Kenka KN

KAPIT:  Menteri Ba Opis Kepala Menteri (Menteri Tugas-tugas Khas), Tan Sri  Datuk Amar Haji Adenan Satem ngansak mensia mayuh ke beempu Tanah Adat Bansa Asal Bumiputera  (NCR) di menua tu ngenataika peminta sida ngagai Opis Tanah enggau Penyukat  (JTS) ngambika tanah ulih disukat lalu diberi pala tanah nitihka atur Inisiatif Baru NCR perintah menua.

“Enti tanah NCR kita udah disukat JTS ngena chara sukat keliling, nadai orang ulih ngambo tanah kita agi.  Retinya, tanah NCR ke udah disukatnya sigi endang diempu kita nyentukka jemah ila.”ku  Adenan.

Iya bejaku munyi nya ba Pengerami Nyuaka ‘Warta Rizab Gunasama Bumiputera’ ba sitak Sungai Amang-Melekun, Kapit enggau sungai Sipan/Sesawa, Song sereta nyerahka chek Bayar Ganti Rugi /Tanah ngagai orang ke beempu tanah ti dikemansangka nengah tiga iti projek baka, Genturung Pengetap Pendiau Orang di Kampung Baru Kapit, Sub-Stesen 132/33KVSESCO Kapit-Kemantan enggau Palan Kilang Begagaka Pemakai ba Dewan Suarah, kemari.

Bala sida ke beempu tanah nya 45 iku lalu udah nerima bayar ganti rugi sepenyampau RM3.2 juta ari perintah.

Adenan nandu, naka kediatu JTS udah ngemendarka dua buah kandang Tanah Adat Bansa Asal Bumiputera  (NCR) nyadi Tanah Rizab Gunasama Bumiputera nitihka ba Seksyen 6 Undang-undang Tanah Menua.

Dua buah endurnya, di Sungai Amang, Melekun ke mungkur pemesai 120 hektar enggau Sipan Sesawa/Temalat di pelilih menua Song, sepemesa 528.1 hektar.

Ba kandang sitak menua Sungai Amang, Melekun bisi sebuah aja rumah panjai iya nya bisi 74 pintu bilik ti betuaika Tuai Rumah (TR) Achan anak Inang ti ngembuan  urung  1,000 iku ke beempu tanah.

Ba sitak menua Sipan Sesawa/Temalat, di pelilih menua Song bisi tujuh buah rumah panjai ti ngembuan 198 pintu bilik betuaika TR.  Ismail anak Siam, TR. Sepawie anak Kalau, TR. Kideng anak Luang, TR Erong anak Geramong, TR Richard Nujong anak Abit enggau TR Rawing anak Pasang.

Tanah ke udah digazet perintah ba kandang menua Sipan Sesawa/Temalat tu diempu urung 1,300 iku.

“Tu meh kelai perintah ngmatka danji sereta ngelala tanah adat asal bansa Bumiputera (NCR).

“Nya alai, aku ngarapka bala tuai raban bansa enggau TR ke bisi datai saritu ngelalu serta ngansak rumah panjai bukai nganjung peminta nyukat tanah NCR ngambika bala pengereja pengawa ari JTS ulih mantu nyukat tanah.” ku Adenan.

Dulu agi arinya, Superintendent JTS Kapit, Norlina Ra’ee madahka, naka kediatu JTS Kapit benung deka ngemendarka empat agi kandang menua ti udah disukat iya nya, Sungai Menuan, Sungai Belawai, Batang Rajang/Balui, Belaga enggau Nanga Mujong/Pulau Won Baleh ti mungkur pemesai urung 13,618 hektar tanah.  Lalu pia mega opis nya benung nyukat urung 30,103 hektar tanah ba empat kandang endur di Kapit ba taunt u.  Sama bisi datai ba pengeraminya, Residen Kapit Dahim Nadot, tiga iku Sekretari Politik Kepala Menteri, Wilson Nyabong Ijang, Daniel Jubang Kanyan, Tengku Geruna, Sapit Direktor Pentadbiran ba Indu JTS Kuching, Sajeli Kipli, bala pengari sereta pemesai ari opis-opis perintah enggau tuai-tuai raban bansa.

 (Sumber:  Utusan Borneo, 12 Oktober 2011)