Randau ruai: Anak Sarawak

Maya ti ngirup kupi bedau lama it udah aku betemu enggau kaban lama lalu nanya iya angka iya bisi tetemuka orang ti bisi tanah ari 100 tauka lebih hekter dikena ngamansangka pengawa betanam.

Kaban aku nya enggau gaya ti lembau amat nyaut, iya madahka bisi sebidang tanah tang semina cukup kena sebuah rumah enggau utai ditanam mimit. Enti deka ka tanah sampai beratus ekar, anang berundingka nya, ku iya, laban semua tanah udah ambis dirampas perintah Barisan  Nasional (BN).

Tekenyit aku maya ningga utai ti dipansutka mulut iya, serta mikir orang ti aku kelala baka iya ulih bejaku baka nya tambah mega iya orang ti bepelajar tinggi.

Menteri Pemerambu enggau Pengatur Sumber II, Datuk Amar Haji Awang Tengah Ali Hassan sebedau tu madahka, jaku ti madah ke perintah ngerampas tanah rayat semina jaku kena sida parti penyakal dikena ngasuh rayat takut serta ngasuh enggai meda perintah.

Semina parti penyakal aja ti selalu nuduh perintah baka nya tang ukai sida ti ngempu tanah.

Pia mega Datuk Amar Awang Tengah madahka perintah patut ngena tanah dikena ngemansangka menua tu.  Tang enti sema perintah ngambi tanah rayat, duit pampas deka dibayar enggau patut.

Iya madahka tanah tu isu ti pemadu angat ti dikerandauka setiap iku rayat, nyengkaum pangan lama iya pan nyau masuk panjuk jaku umbuk sida pembangkang ti madahka perintah BN ngerumpak tanah hak adat Bumiputera (NCR).  Aku ngarap ka semina pangan lama aku nya aja ke bejaku munyi nya.

Aku nemu serta arap bendar Perintah Barisan Nasional sigi enda ngerumpak tanah hak adat Bumiputera.  Ari nya tadi kitai patut sama-sama madahka diri sebilik, bala pangan enggau rayat di menua pesisir ti beempu tanah hak adat Bumiputera, iya nya perintah BN diatu benung mantu rayat ti bisi tanah hak adat bumiputera ngaga sereta nyukat perimeter survey ke tanah NCR sida tu lalu ari nya awakka sida nyadi orang ke ngempu tanah nya ke tetap.

Lebuh tanah sida udah disukat sida tau muka mayuh agi tanah endur ngaga pengawa betanam betupi chara begulai tauka bedandang, ngambika tau nambahka tikas pemanah pengidup sida.

Aku mega arap bendar, udah orang ke beempu tanah teulihka hak milik tetap, nya aja meh reta tauka aset ke besai bendar reti ti tau diwariska sida ngagai gernerasi ti baru jemah ila.

Aku arap bendarka orang ti beempu tanah, bansa tanah ti dikumbai tanah hak milik bumiputera ke empai disukat tau madahka diri ngagai perintah BN awakka ngeluruska kerja-kerja sida serta nentuka ni bagi tanah ti dikumbai hak milik bumiputera enggau bagi tanah ke dikumbai tanah perintah.

Semina perintah BN aja meh ke ulih mantu orang ke beempu tanah adat bumiputera ba pengawa nyukat tanah awakka pulai ke penguntung rayat.

(Sumber:  Utusan Sarawak, 9 April 2011)