KAPIT:  Opis Tanah enggau Survei (JTS) mujur ngatur Program Randau bekaul enggau inisiatif baru Tanah Adat Bumiputera (NCR) ba Rumah Kayan Nyelang, Nanga Dai, apin lama tu tadi.

Tuai Rumah (TR) Kayan madahka program ke diatur raban JTS nya digaga laban menerima peminta ari rayat ba rumah panjai nya empu senentang penerang ke silik bekaul enggau inisiatif baru NCR itu.

“Aku ngarika rayat ke di pegai aku, bisi ngaga peminta ngambika raban JTS ulih ngatur program berandau bekaul enggau inisiatif baru NCR nya ba rumah kami.  Pengawa nya diatur ngambika kami bulih penerang ke silik sereta enda ningaka jaku selebubu ngapa ari raban ke nadai tanggung pengawa. 

“Nengah program nya mega, rayat nemu enggau silik sereta nerima juluk perintah ti deka nyukat tanah enggi kami. Ukai semina nya aja, kami ngarapka pengawa ke bansa tu ulih dipejalaika ba menua bukai,” ku iya. 

Iya nandu baru, urung 150 iku nyengkaum rayat ari rumah panjai ke bukai beserimbai enggau rumah panjai sida bisi datai ngulu program nya. 

“Aku enggau ati ti gaga, meri besai terima kasih ngagai raban JTS laban ngelimpangka awak nerima peminta kami sereta ngatur program ke manah baka tu,” ku iya. 

Bisi datai meri licha ba pengerami nya, iya nya Penolong Pemesai Tanah enggau Survei Johny Kasau, begulai enggau raban pengereja pengawa JTS ke bukai.

 (Sumber:  Utusan Borneo, 17 Februari 2011)