SARATOK : Rayat ba menua ari baruh pegai empat iku penghulu iya nya Penghulu Isa Geng, Penghulu Garan Chunggut enggau Penghulu Amit @ Hamid Salle ti ngembuan tanah Adat Bansa Asal (NCR) ba pelilih Mit Saratok deka berengkah disukat tembu ngintu pengerami Hari Raya tu ila.

Pengawa nyukat perimeter (NCR) nya deka dipejalaika Opis Tanah enggau Survei (JTS) Pelilih Betong.

Kepala JTS Pelilih Betong, Anthony Abo madahka, pengawa nyukat Tanah NCR nya siti ari pengawa ti deka dipejalai perintah enggau JTS belama.

“Kami arapka orang ti beempuka tanah NCR ditu meri kerejasama ngagai JTS lebuh sida bejalaika pengawa nyukat perimeter nya ila,” ku iya lebuh ti bejaku ba randau nya ditu, apin lama ti udah.

Dipejalaika bisi 200 iku datai ngulu randau nya.

Ku Anthony, orang ti beempuka tanah NCR Saratok untung enda laban tanah ti NCR ti ditanka sida ngelama tu dikemendarka perintah taja pan pengawaa nyukat perimeter deka dipejalaika dulu.

“Udah nya ila baru tanah nya ditetapka nyadi tanah Rezab Gunasama(Bertanam bertupi) Bansa Asal ari baruh Seksyen 6 Atur Tanah Menua.

“Nangkanka nya ila, tanah nya deka disukat ungkup seseiku ngambika surat beempuka tanah ari baruh Seksyen Atur Tanah Menua ulih dipansutka,” ku iya.

Ku Anthony, orang ti beempuka tanah NCR ba menua Entebu / Selambong / Bajau udah ditetpka nyadi Rezab Gunasama (Bertanam betupi) Bansa Asal ari baruh seksyen 6 Atur Tanah Menua.

Sama bisi engau ngulu pengerami nya Sekretari Sapit Menteri Perengka Pengangkut Jelaing Mersat, Desmond Reynold Jemen, Tukang Sukat JTS Betong, Kudie Sandak, Pemesai ari Opis Tanah JTS Betong, David Laeng enggau bala ketuai raban bansa ngelingi menua Saratok.

(Sumber : Utusan Borneo , 25 Ogos 2011)