BETONG: Opis Tanah enggau Survei (JTS) Betong minta orang ti ngempu tanah NCR ba kandang menua Ulu Paku, Spaoh meri kerejasama penuh ngagai orang ti bejalaika pengawa nyukat lot ngatika diri ba atas tanah NCR di Nanga Paun, Penom enggau kandang menua ke ngelingi nya.

Ba pemansang pengawa nyukat tanah NCR ba kandang menua Ulu Paku sida bisi Iubah mimit bejalaika pengawa laban nadai kerejasama ari orang ti beempu tanah NCR dia.

Perindikarinya, Ketuai Opis Tanah enggau Survei Betong Anthony Aboi, arapka orang ti ngempu tanah NCR ke nuntut hak tanah NCR sida,ngentara tanah sida.

“Ari nya raban JTS nemu entara tanah sida.

“Pekara tu amat begunaka kerejasama ari semua ngambi ulih ngemudahkan raban JTS bejalaika pengawa sida sereta mega ngemudahkan pengawa ngeluarka surat ngempu tanah ari baruh Seksyen 18 Atur Tanah Nengeri,” ku iya.

Ku iya baru, pengawa nyukat lot ngatika diri tanah NCR ba kandang menua Ulu Paku, Spaoh nengah Inisiatif Baru NCR enda mujur dipejalaika enti nadai kerejasama ari orang ti beempu tanah nya.

Berebak enggau nya, pengerami Bejadika Pengawa Nyukat Lot Individu Tanah NCR Tikas Nengeri udah dipenyadika Sapit Kepala Menteri Datuk Patinggi Tan Sri Alfred Jabu di Penom apin lama ke udah, ke alai Jabu meransang orang ti beempu tanah NCR anang enda ngena awak nya nyukat tanah NCR sereta ngerintis entara tanah NCR sida.

(Sumber:  Utusan Borneo, 2 Julai 2014)