SARATOK: Pengirau ati urung 700 ruang bilik ba kandang Entebu/Selambong/Muton senentang status Tanah Hak Adat Bumiputera (NCR) udah nadai agi pengudah Opis Tanah enggau Survei (JTS) Betong madahka tanah sida iya udah dikemendarka sereta digazet nyadi tanah Rezab Komunal Bumiputera nitihka Seksyen 6 Kanun Tanah Negeri.

Penguasa Tanah enggau Survei Betong, Anthony Aboi madahka tanah ba kandang Entebu/Selambong/Muton ke bisi 1,024.8 hektar pemesa nya entara kandang ke udah dikemendarka sereta udah digazet nyadi Rezab Komunal Bumiputera nitihka Seksyen 6 Kanun Tanah Negeri.

Ku iya, baka ke udah didanji perintah ngena lnisiatif Baru NCR baka ke dipadahka Menteri Besai Datuk Seri Najib Tun Razak lebuh iya nemuai ngagai bagi menua Miri ba taun 2010 ke udah ngayanka pengelurus perintah Barisan Nasional (BN) ke ngamatka danji ngagai rayat.

“Perintah seruran ngamatka danji ngagai rayat sereta deka nentuka semua Adat Hak Bumiputera (NCR) ditu disukat sereta diberi surat ngempu dikena meri jamin ngempu tanah NCR sereta ngelindung ngempu tanah NCR nitihka Inisiatif baru NCR.

“Aku gaga amat laban tebal agi sida ke diau ba tiga kandang menua iya Entebu/Selambong/Muton udah datai nyereta dialog sehari tu. Aku mega gaga laban opis kami pengujung iya ulih nitihka peminta kita ke diau ba endur tu,” ku iya mansutka jaku maya sesyen dialog Inisiatif Baru NCR ke diatur ba Rumah Anau, Entebu Atas kemari.

Ku Anthony, dikena nentuka mimpi urung 700 iku sida ke diau ba kandang nya bisi surat ngempu tanah nyadi nyata, nya kebuah JTS Betong ngatur siti dialog begulai enggau bala sida ke bisi ngempu tanah NCR ba kandang nya.

Ku Anthony, JTS Betong deka berengkah bejalaika pengawa nyukat tanah NCR kandang Entebu/Selambong/Muton ngambika ulih meri surat ngempu tanah nitihka Seksyen 18 Kanun Tanah Nengeri berengkah ari bulan Julai tu ila.

lya ngasuh sida ke ngempu tanah NCR ba kandang Entebu/Selambong/Muton ke udah digazet ngambika meri kerejasama ngagai JTS Betong ba pengawa nentuka antara tanah sida empu.

“Enti sida ke ngempu tanah meri kerejasama maya pengawa nyukat tanah, aku pechaya hak sida ngempu tanah ulih diberi enggau jampat,” ku iya.

Dulu ari nya bisi 21 kandang menua udah dikemendarka sereta digazet nyadi tanah Rezab Komunal Bumiputera ke nyengkaum semua pemesai urung 69,000 hektar.

Ba senentang pekara nya Tuai Rumah Anu Chula ngumbai perintah ke ngemendarka sida ngempu tanah komunal raban bansa Iban ba kandang Entebu/Selambong/Muton enggau iya ke ngelingi nya ngayan perintah enggau JTS sigi endang enggau naka ulih nyaup rayat sereta meri besai terima kasih nagagi perintah nengeri laban ngasuh mimpi sida ke deka meda tanah nya disukat nyadi nyata.

Ku Anau, ketegal udah dipadahka baka nya JTS Betong deka berengkah bejalaika pengawa nyukat tanah NCR ba tiga kandang nya ngambika ulih meri surat ngempu tanah nitihka Seksyen 18 Kanun Tanah Nengeri berengkah ari bulan Julai tu iIa ngasuh urung 700 iku sida ke ngempu gaga amat laban tanah nya kala dikena Tabung Haji Plantation (THP).

“Sebedau tu tanah NCR ba kandang Entebu/SeIambong/Muton ke udah dikena THP ulih dipulaika baru ngagai kami lalu kami ulih nyintak seput panjai enggau pemutus ke udah digaga perintah.

“Kami ke ngempu menua tu meri besai terima kasih ngagai perintah lebih agi JTS Betong laban udah ngasuh tanah NCR ba kandang Entebu/Selambong/Muton digazet lalu nya siti pemeri ari perintah ngagai komuniti raban bansa Iban ba kandang Entebu/Selambong/Muton,” ku iya.

(Sumber:  Utusan Sarawak, 25 Jun 2014)