BETONG: Perintah Barisan Nasional (BN) enggau Menteri Besai (PM) Malaysia, Datuk Seri Najib Tun Razak endang seruran ngemeratka semaya BN ke deka nulung rayat menua tu nyukat tanah Adat Bansa Asal (NCR) Sarawak, enda ngira tanah nya enggi bansa Melayu, Melanau, Iban, tauka bansa Dayak bukai.

Menteri Industri Pengawa Bekebun Bedandang Besai enggau Komoditi Dato Sri Douglas Uggah Embas madah naka 23 Februari 2013, penyampau tanah NCR di Sarawak ke disukat bisi dalam 681,739 hektar, lalu ari penyampau nya, 328,720 hektar udah tembu disukat, lalu 152,000 udah dikelai.

“Anang mendingka parti penyakal. Sida (penyakal) pan alah maya bepilih tadi di menua pesisir.

“Tanah pesaka kitai reta ke mayuh endar reti ba kitai. Aki ini kitai berani berambun nyawa ngiga tanah ngambika kitai mujur.

“Nya alai ngarika rayat Bumiputera di menua tu, ngambika PM ulih nimbang meri mayuh agi ungkup ngagai kitai kena nyukat perimeter lalu ngambika pengawa nyukat perimeter tu terus digaga, ngambika rnanggai taun 2020 orang Bumiputera Sarawak deka bulih pala tanah.. Ukai BN ngerampas tanah tang meri pala tanah ngagai kitai,” ku iya.

lya madah di sitak pelilih menua Betong, pengawa nyukat tanah NCR nyauka semua tembu, lalu diatu semina deka nyukat mechah ungkup seseiku ari baruh seksyen 18.

“Ke sukat perimeter tu, Seksyen 6 ti berat lalu udah dikelala dalam kandang tanah menua, lalu beratika ni bagi ke udah diberi kelala nyadi NCR ulih Perintah...,Ke bagi nya deka dikelai,” ku lya.

Iya madah baka tu ba atur pengawa ngelaluka PM Ngabang Hari Gawai 2013 ngagai Rh Wilson Begat anak Bakir di Penom, Ulu Paku, Betong ditu, kemari, ke bela digulu urung 5,000 pengabang ari sitak Betong, Sarikei, Saratok enggau Kuching.

Iya nambah, BN udah menang enggau majoriti ke besai, lalu baka nya mega enggau Betong (alai iya empu nyadi MP sitak tu), lalu ditambah agi enggau pengawa ke dipangku iya empu nyadi Menteri Industri Bekebun Bedandang Besai enggau Komoditi, iya deka terus ngangkatka pengawa nya kelebih agi di menua pesisir ngambika mayuh agi kebun sawit, getah, lada enggau sernakau deka dikemansangka.

“Ngambika orang ke bekebun mit di Malaysia kelebih agi di Sarawak bulih pengaya, bulih pengeraja,” ku iya.

Ba rumah panjai Rh. Wilson Begat anak Bakir enti rumah panjai nya deka dipadu nyadi rumah pesaka, ku Uggah pekara nya udah diperunding enggau PM lalu agi benung ditimbangka, tang ba program Nyemilik ba rumah panjainya mayuh agi bisi peluang ulih diangkatka laban pemanab rampa menua, rumah panjai nya empu ke keterubah iya digaga  dalam kandang 86 taun tu ke udah, ke agi ngena tiang tebelian asal.

“Baka tu penegap rumah panjai kami, baka nya mega penegap sukung rayat menua pesisir ke Perintah BN enggau ngagai PM.

PM mai rnenua kitai mansang, mayuh agi projek, pegelantang, deka digaga. Anak, uchu kitai bisi kerja, pandai besekula ngambika hari jemah ila deka manah agi. PM agi bisi mayuh program transformesyen ke deka digaga iya.

“Baka BR1M, projek jalai alun, bantu orang betanam betupi enggau orang berikan sama enda ditinggal,” ku iya,

Sama bisi nguluka atur pengawa nya kemari, Datuk Amar Rosmah Mansor, Sapit Kepala Menteri Datuk Patinggi Tan Sri Alfred Jabu anak Numpang, Kaban Kunsil Nengeri (ADUN) Bukit Saban Robert Lawson Chuat, Sapit Menteri Pemansang Menua Pesisir enggau Tengah Datuk Alexander Nanta Linggi, Menteri Kereja Datuk Fadillah Yusuf, Puan Sri Empiang Jabu, Tan Sri Datuk Amar Morshidi Ghani, raban kaban parlimen enggau kunsil nengeri bukai enggau Tuai Rumah Wilson Begat anak Bakir,

(Sumber:  Utusan Borneo, 10 Jun 2013)