KAPIT: Lapan buah rumah panjai ba kandang menua Sungai Musah enggau Sungai Takan di Katibas pegai pelilih mit Song udah nerima ‘Nutis Gazette’ nengah Seksyen 6 Kod Tanah Sarawak, ngambika tanah Adat Bansa Asal (NCR) sida disukat nengah inisiatif baru.   Pengerami nya udah diatur Opis Tanah Enggau Survei Kapit ba Rumah Puso Anak Ketupong, Sungai Musah kena lemai Hari Empat minggu nyin kemari.

Pengerami nyuaka Nutis Gazette ngagai lapan buah rumah panjai nya udah dipenyadika Kaban Kunsil Nengeri Katibas, Datuk Ambrose Blikau Anak Enturan enggau chalun BN-PBB ungkup sitak Kapit, Datuk Alexander Nanta Linggi.

Lapan buah rumah panjai ke nerima nutis gazette iya nya Rurnah Jarop ba Nanga Sepadi, Rumah lkau ba Nanga Musah, Rumah Jala, Nanga Miaw (suba Rumah Lintang), Rumah Philip Nang Semulong, Sungai Musah, Rumah Pillai Nanga Miaw, Rumah Dampol Sungai Musah, Rumah Japok Nanga Senyaro, Sungai Musah enggau Rumah Tibong Nanga Rarong, Katibas.

Ku Superintenden Opis Tanah Fnggau Survei Kapit, Norlina Ra’ee, pengawa nyukat perimeter tanah NCR nengah seksyen 6 kod tanah Sarawak nya singkang keterubah dikena nentuka status tanah NCR nyadi tanah galau (pemakai menua) ari baruh program baru inisiatif.  Singkang ti kedua iya nya, nyukat lanah ungkup seseiku sereta meri pala tanah nengah sekyen 18 Kod Tanah Sarawak nitihka garis entara ke udah disukat.

Ku iya baru, siti pekara ke beguna amat bekaul enggau pekara tanah Adat Bansa Asal ari baruh seksyen 18 Kod Tanah Sarawak iya nya, orang ke ngempu tanah enda ibuh mayar premium tanah lalu tanah nya mega lalu tetap diempu sida.

Ku Norlina, nyentuk ke 30 April 2013 tu tadi, 17 buah menua dalam pelilih mit Kapit udah dikemendar disukat perimeter nengah program inisiatif baru nya lalu 10 buah menua ke mungkur pemesai 2,000 hektar tauka 60,000 ekar udah disukat.

Ku iya, ari 10 buah menua ke udah disukat, 9 buah udah diberi Nutis Gazette ari baruh seksyen 6 Kod Tanah Sarawak. Ba pelilih mit Song semina sebuah menua udah diberi Nutis Gazette, iya nya ba Sipan/Sesawa ke mungkur pemesai 528.1 hektar tauka 1,300 ekar.

Pengerami nyuaka Nutis Gazette udah dipenyadika Menteri ba Opis Kepala Menteri, Tan Sri Datuk Amar Adenan Haji Satem kena 11 Oktober taun 2011 suba.

Pengawa nyukat perimeter tanah Adat Bansa Asal ba Sungai Musah enggau Sungai Takan deka mungkur 8 buah rumah panjai, 137 ruang bilik ke ngembuan 960 iku mensia.

Norlina madahka pekara nya udah dikemendarka perintah kena 24 Januari taun 2011 ke mungkur 1218,2 hektar tauka 3,010 ekar tanah.

Pengawa nyukat perimeter tanah ba sekeda kandang menua udah dipejalaika belabuh ari 9 March 2012 sereta tembu kena 5 April 2012, ke disukat sereta udah digazette 4 tim penyukat ari Opis Tanah Enggau Survei Sibu kena 27 November 2012 ari baruh lumur Gazette Number LN 158, Lot 84 Blok 19 Pelilih Mit Katibas enggau Lot 6 Blok 1 Pelilih Mit Bangkit” ku iya seraya madahka pengawa nyukat udih nujur dipejalaika enggau manah nengah bantu ari orang ke ngempu tanah Adat Bansal Asal nya.

(Sumber:  Utusan Borneo, 7 Mei 2013)