PERINTAH udah nimpuh pengawa nyukat tanah Adat Bansa Asal (NCR) enggau enda bebayar ngena Inisiatif Baru NCR nyentuk ngagai taun 2015.

Naka ke diatu mega udah mayuh tanah NCR di serata menua tu udah disukat ngena program nya, tang agi bedau mega mayuh genturung menua tauka tanah NCR ke bedau disukat.

Tanah ke bedau disukat nya, bisi nya ketegal endang empai ngaga peminta. Bisi mega nganti peminta nya dikemendarka sereta bisi mega ketegal sida ti ngempu tanah enggai tanah tauka genturung menua sida disukat.

Kelimpah ari nya mega, nyangka bisi tanah ke bedau bisi bekau penyarut, ti ngasuh perintah bedau nyukat seagi tanah nya bedau bisi penyarut tauka enti bisi kes ba court.

Perintah besai udah meri duit agih bemilion ringgit dikena ngatur pengawa nyukat tanah NCR. Tang taja pia, agi mayuh orang kelebih agi sida parti penyakal mutar melitka pengawa nyukat tanah NCR.

Rayat pin pia mega, mayuh ke ningga jaku sida penyakal, ti ngumbai pengawa nyukat tanah NCR nya sebengkah ari jalai perintah ngerampas tanah rayat.

Mayuh mega lebih agi sida ti diau di menua pesisir, ‘diracun’ runding sereta penemu lebuh ti kelalu ninga Radio Free Sarawak.

Ukai enda ngasoh ningga semua utai ari radio nya, tang lebuh ti mending pandai magi sereta mida, utai ti nyengenda tauka amat sereta beguna ngagai diri empu.

Tang tusah mega deka bejaku laban ninting mensia ngembuan penemu kediri empu. Mayuh nya, taja utai peda nyengala ba mua mata diri empu agi mega bedau enggai ngaku sereta enggai ningga penemu orang.

Lebuh sida ari Opis Tanah enggau Survei ngaga siti dialog ba sebengkah rumah panjai di genturung menua bagi Bakong, di Miri. Ulah mensia ke tusah amat deka dibai berunding sereta ningga penemu orang, endang nampak amat maya nya.

Seiku ari apai tuai ke ngaku diri ex-soldadu ku iya, endang enggai mati idup, sigi enggai tanah iya disukat.

Ku iya: “Enti tanah orang bukai deka disukat, sukat kita mih, tang tanah aku anang, kelaung ke kita”.

Ditaga ati, laban ti ex-soldadu deka mantai ke penemu ti manah, sereta tau matak orang bukai awakka ulih nerima pengawa pemansang ti deka dibai tauka diatur perintah.

Tang penemu tudah tuai limpang ke bukai, laban enti disukat kenu ku iya, nya sebengkah ari jalai perintah ngerampas tanah sida di menua nya.

Sinu mega ninga penemu tudah tuai, bangat mabu amat. Kati ku enda madah baka nya, laban tanah sida menua nya sebengkah ari iya udah disukat maya taun 1980-an suba, mayuh tanah NCR sida udah bisi pala tanah.

Nyentukka diatu bedau mega sida ngempu tanah nya, nadai perintah ngambi tanah sida iya. Penyarut mega nadai nyadi ba tanah ke udah disukat nya, laban endang bisi ngembuan pala tanah kediri empu, sekalika nya disimpan sida ti ngempu tanah tauka ti disimpan opis perintah.

Seiku agi sida di rumah panjai nya, madahka, iya endang enggai tanah iya disukat, laban enggaika nadai endur beumai. Senentang penemu iya tu kita ti macha randau tu empu mih berunding, semina siti aja penemu aku, enti iya nadai tanah, disukat, tauka enda disukat pin, sigi nadai mih iya endur .beumai.

Laban ke ditemu, mayuh amat sida ke enda nyukung pengawa nyukat tanah NCR, endang sida ke nadai tanah, sida nya ke senang amat nigga jaku sida penyakal.

Baka ba rumah panjai nya, ke ngembuan pemanjai lebih ari 100 pintu, semina seiku dua ke enda setuju enggau pengawa nyukat tanah sida. Enti dikira nyangka manggai ngagai 95 peresin sida ke setuju disukat.

Ngambika chunto, seiku sida ke angkat bejaku, ngasuh perintah berumban nyukat tanah sida iya, enggaika ditujah kompeni sabun (kelapa sawit).

Ngichaka enti udah disukat, tanah NCR sida iya ti dikemansangka sida kompeni sabun deka dibayar enggau rega ke jauh tinggi agi ari tanah ti bedau ngembuan pala tanah.

Ditangkanka nya mega, enti udah bisi pala tanah tauka warta tanah, kompeni sabun mega meseti minta pemendar ari sida ke ngempu tanah, sekalika setuju tanah sida iya dikemansangka tauka enda.

Ke bendar iya, agi rnayuh enda nemu tauka sengaja ngaga diri enda nemu, penguntung ke tau diasaika rayat enti tanah NCR sida udah disukat sereta diberi warta tauka pala tanah.

Ngambika chunto aja, sebengkah ari penguntung iya, tanah NCR nya deka terjamin tauka enda ngasuh irau ati ari ti dirampas orang tauka kompeni, rega tanah mega deka tinggi agi, pala tanah nya mega tau dikena ngaga peminta endur ngemansangka pengawa betanam betupi enggau mayuh agi guna bukai.

Ke bendar iya, pengawa nyukat tanah NCR endang amat meri penguntung ngagai rayat ke ngembuan tanah, tang seiku-dua sida ke enda setuju, enda alah kira mih nya.

Laban kitai meseti nemu, dunya majak mansang, majak maju, maya diatu enggau jeman ila, kitai enda ulih semina nunjukka tanah nya tanah kitai ketegal apai indai, aki ini kitai benimba ba tanah nya.

Tang semua utai meseti bisi surat, bisi bukti ke bendar. Iya ukai semina meri penguntung ke dudi hari enti tanah nya dikemansangka tang tau mega mutarka penyarut.

(Sumber:  Utusan Sarawak, 4 Februari 2013)