Penyerakup dalam komuniti, kualiti pelajar enggau geran tanah ke uIih nyadi reta pesaka

Dikarang Chris Bishop

KUCHING: Penyanding Penemu Gerempung Dayak Bidayuh Menua (DBNA) Dato Sri Michael Manyin anak Jawong netapka tiga bengkah pekara ti tau nentuka bansa Bidayuh mansang nitihka singkang bansa bukai.

Ku iya, nyadi sebengkah bansa ti mit dalam Malaysia ke semina ngembuan urung 200,000 tubuh, raban bansa Bidayuh patut ngemeratka tiga bengkah pekara ti deka nentuka bansa tu mansang enggau tegap.

“Keterubah, Bidayuh patut ngemeratka penyerakup dalam komuniti diri kena nempa pemujur bansa.

“Taja pan bisi sekeda kitai ngembuan runding politik ke bebida tang enti ba pekara pemansang raban bansa Bidayuh, semua pekara nya patut diengkahka ke tisi dulu laban semina kitai Bidayuh aja ulih nentuka singkang bansa diri,” ku iya.

Kitai chukup untung ketegal tebal agi raban bansa Bidayuh sepengelama 20 taun ke udah tauka sepengudah 50 taun merdeka, Bidayuh seruran begulai sejalai, tandu iya.
Iya mansutka jaku nya maya bejadi LichaTuai Raban Bansa Bidayuh ke mega nyadi program Graduasi Sekolah Bahasa Warisan Bidayuh ti diatur di Dewan DBNA ditu, kemari.

Iya ke mega Menteri Pemansang Perengka Guna enggau Penyambung netapka pekara kedua ti patut dikemerat iya nya tiap iku raban bansa Bidayuh patut ngembuan kualiti.

Berindik ari nya, Bidayuh patut ngemeratka pekara pelajar lalu ngakun pengawa nya sebengkah ari atur beranakka puku ungkup komuniti Bidayuh.

“Aku ngansak kitai semua ngemeratka pekara pelajar tauka ngembuan pengelandik bukai ti tau diasur maya begigaka pengawa. Semina nengah penemu, penau enggau pengelandik raban bansa Bidayuh deka ngembuan kualiti,” ku iya.

Nentuka tanah NCR ngembuan surat geran tanah nya di pekara ketiga ditetapka Manyin ulih mai pemansang ngagai Bidayuh.

Ku iya, tanah NCR ti udah dipansutka geran tanah deka nyadi reta pesaka tuai bansa Bidayuh nyentuk ke jemah ila.

“Enti kitai udah bisi surat geran tanah reti nya tanah nya diempu kitai. . .setuhai-tuhai (jaku Bidayuh),. .enti enda kitai deka nyadi orang kampar ba tanah diri. Tanah ke bepala tu ulih dikemansang nengah bemacham chara ti tau mulaika penguntung. 

“Tanah ti udah disukat mega deka muntangka raban nembiak baru bansa kitai ti benung kereja di nengeri ngelala tauka nemu endur apak tanah diri jemah lalu tu ulih nyeliahka penyarut,” ku iya.

Berindik ari nya, Manyin  ngansak bansa Bidayuh nyukung program sukat kelingi perintah ti benung ransing dipejalai diatu.

Bela datai Sapit Menteri Luar  Malaysia  Datuk Richard Riot Jaem, Menteri Muda Tanggung Pengawa Raban Bansa Datuk Peter Nansian Ngusie, Kaban Parlimen Mas Gading Datuk Dr Tiki Lafe, Presiden DBNA Dam Ik Pahon, Temenggung Datu Stephen Josse, raban penghulu, pemancha sereta orang bukai.

(Sumber:  Utusan Borneo, 25 November 2012)