Pemesai nya enda nyerangkung pemakai menua enggau pulau galau

Dikarang Rengenyan Labang enggau Chris Bishop

KUCHING: Bepelasarka rikut Opis Tanah enggau Survei (JTS), pemesai tanah ti dipelaba Hak Adat Bumiputera di serata nengeri Sarawak kurang lebih 1.5 juta hektar pemesai, ku Menteri Muda Pengatur Pengeraja Asal enggau Rampa Menua Datuk Mohd Datuk Mohd Naroden Majais.

“Pemesai 1.5 juta hektar nya enda nyerangkung pemakai menua enggau pulau galau, kelimpah ari enti amat nyata (bukti) Hak Adat Bumiputera dalam kandang nya.

“Kediatu,bisi empat kandang endur di sitak Kedup ti kurang lebih 5,000 hektar pemesai udah dikemendar sereta disukat Opis Tanah enggau Survei.

“Ari penyampau nya (5,000 hektar) kurang lebih 500 hektar pemesai udah digazzet nyadi rizab dikena sama Bumiputera bejalaika aktiviti bekebun bumai nengah Seksyen 6 Kanun Tanah. Lalu pemesai ke lebih nya benung disukat,” ku iya ti nyadi Menteri Muda ba Opis Kepala Menteri (Pemansang Orang Dagang Bumiputera).

Naroden mansutka pekara nya lebuh iya ti nyaut tanya ari Martin Ben (BN-Kedup) maya tanya saut aum Kedua Renggat Kedua, Aum Kunsil Nengeri Ketujuh Belas ke diatur ba Kunsil Nengeri ditu kemari.

Nambahka nya, Menteri Muda Pemansang Tanah, Datuk Abdul Wahab Aziz madahka perintah ngatur mayuh perambu enggau program dikena ngemansangka tanah hak adat Bunniputera (NCR) ti enda dikemansangka.

Ku iya, endang juluk perintah deka ngemansangka tanah NCR kena meri rega tambah ngagai orang ti beempu tanah sereta perintah nengeri, nengah pengawa nanam utai ti ulih meri mata duit.

“Entara perambu iya nya ngemansangka kebun bedandang besai enggau mit ke dipejalaika ijinsi perintah besai enggau nengeri baka SALCRA,FELCRA,RISDA, Opis Menteri Betanam Betupi enggau Sarawak Land Development Board (SLDB),” ku iya lebuh ti nyaut tanya ari Dr. Johnichal Rayong Ngipa (BN-Engkilili) bekaul perambu ngamansangka tanah NCR ti enda dikemajuka.

Kelimpah ari nya ku Abdul Wahab, orang ti beempu tanah NCR mega tau minta bantu nengah skim nanam tauka nanam baru kelapa sawit ke orang bekebun mit ti dipejalaika Malaysia Palm Oil Board (MPOB).

(Sumber:  Utusan Borneo, 24 November 2012)