LIMBANG: Perintah nengeri ngena Opis Tanah enggau Survei Sarawak (JTS) udah nerima mayuh peminta ngambika nyukat tanah Hak Adat Bumiputra (NCR) ngena proses nyukat tanah nitihka Inisiatif Baru NCR ke berengkah dikena ba bulan Julai 2010 ke udah.

Menteri ba Opis Kepala Menteri ti mega Menteri Pengawa Khas, Tan Sri Datuk Amar Adenan Satem madahka, ngena atur warta tanah NCR nyadika Rizab Sama Dikena Bumiputra, sida ke ngempu tanah enda patut takut sereta irau ati senentang status hak tanah NCR sida.

Ku iya, JTS mega deka ngatur pengawa nyukat ba kandang tanah NCR ke bedau disukat baka ke udah dipinta sida ke ngempu tanah sebedau tu.

“Warta nitihka Sekyen 6 Kanun Tanah Negeri baka ke bisi diatu menjamin sereta dikemendarka undang-undang ngagai sida ke ngempu tanah NCR.

Pekara ke baka tu dikena nyeliahka sebarang penanggul enggau garis tanah ke bisi diambi pangan diri baka ke bisi nyadi sebadau pengawa nyukat dkemujurka.

“Proses tu endang ngena timpuh ke lama mimit laban iya deka terus diatur lalu perintah endang komited deka ngasuh tanah nya diempu sida ke ngempu tanah ari pengawa nyukat tanah NCR sida,” ku iya mansutka jaku munyi nya ba Pengerami Nyuaka Warta Seksyen 6 Rizab Dikena Sama Bumiputera (Betanam Betupi) Bagi Menua Limbang kena Hari Satu ke udah.

Adenan mega madahka, perintah udah ngerah JTS ngambika bejalaika pengawa nyukat tanah enggau jampat dikena ngemudahka iya ulih terus diatur ba kandang menua bukai.

Hadi, Orang Megai Kuasa JTS Bagi Menua Limbang madahka, bisi 12 kandang ba bagi menua Limbang enggau pemesai 4,085.5 hektar udah diwarta nyadi Rizab Sama Dikena Bumiputra nitihka Seksyen 6 Kanun Tanah Negeri.

Dua agi kandang pelilih Limbang deka nerima warta ke sama nyengkaum kandang Kampung Bakol/Melaban engg au pcmesai 184 hektar.

Ku iya, kandang menua bukai ke deka nerima warata nyengkaum Kampung Palas/Lubuk Simpor enggau pemesai 82 hektar.

Ba maya ke sama bisi tujuh bengkah kandang ke bukai agi nganti pemendar ngambika diwartaka nya Kampung Pandak Limbang, Pengkalan Gurah, Melanjan, Ranggau, Reda, Semabat enggau Kampung Lintang Lawas.

Empat kandang agi benung ba proses nyediaka  draf warta nya nyengkaum Kampung Berawan, Ranggu/Pangkalan Jawa, Kampung Paya Mengaliong enggau Kampung Induk Sangkar.

Sama bisi enggau ba pengerami nya mega Kaban Kunsil Nengeri (ADUN) Batu Danau, Paulus Palu Gumbang, Sapit Pengarah (Ngatur Pengawa) JTS Sarawak, Ibrahim Lumpu, Residen Limbang Maria Hasman, Penguasa JTS Bahagian Limbang Hardi Fadillah Hamzah enggau Pengarah Yayasan Sarawak Abu Bakar Marzuki.

(Sumber:  Utusan Sarawak, 24 Oktober 2012)