Ngelalau apai indai ke diau ba kandang mengeri ngabas temuda di menua

Dikarang Judan Bungap

 SIBU: Rayat rumah panjai ke gawa ba mengeri dilalau beduaka hari mai tauka nguluka bala anak ngabas temuda (tanah) sida ba menua.

Kaban Kunsil Nengeri (ADUN) Tamin Joseph Mauh anak Ikeh madah, pekara nya aruh dikemeratka laban nangika bala rebak baru enda nemu bagi tanah diri tauka entara tanah enggau orang bukai ti tau ngujungka penanggul ke bukai nyadi.

“Nya alai, kitai ngarapka bala apai indai ti udah lama gawa ba mengeri nadai salah enti bisi kemisi panjai tauka ujung minggu mai bala anak pulai ke menua meda entara temuda (tanah) diri empu.

“Enda ibuh lama, kira 50 taun agi, mayuh bala anak uchu kitai enda nemu dini endur temuda tauka tanah diri empu,” ku iya.

Iya mantaika jaku nya maya pengawa nyuaka ‘Warta Rizab Gunasama Bumiputera’ ba Opis Tanah enggau Survei JTS) Sibu ditu, lemai kilah ensana.

Nampung jaku iya baru, ku Mauh, reta ke agi tinggal ba menua pesisir diatu iya nya tanah.

Reta ke berega tu, ku iya, aruh diintu lalu pengawa nyukat kelingi ari JTS aruh disukung laban pengawa nya dikena ngetanka tanah rayat.

Ku iya, perintah besai enggau perintah nengeri Sarawak nengah JTS chakah bejalaika pengawa ngerintis tanah temuda rayat lebih agi ba menua pesisir.

“Ba Sarawak ambis nadai 1.5 juta hektar pemesai tanah NCR apin disukat lalu urung 70 persin tanah NCR ba menua pesisir apin dirintis.

“Nitihka penyampau tu, rayat lebih agi ba rumah panjai anang ningaka jaku achuk raban ti ngenggaika perintah laban sida tu ngumbuk kita ngambika pengawa ngerintis tanah enda mujur,” ku iya sambil madah perintah nadai ngembuan tuju deka ngambi tanah rayat nengah pengawa nyukat kelingi baka ke disebut penyakal.

Berebak enggau tu mega, Mauh, ngelalau rayat ngambi enda mendingka Radio Free Sarawak (RFS).

Ku iya, sida ti kekuchah bejaku ba radio nya semina nemu bejai orang (perintah) besehari-sari aja.

“Penemu ke dibantai ba radio nya kelalu negative sereta semina ngembuan siti tuju aja iya nya ngambika rayat ngenggaika pegai perintah Barisan Nasional (BN).

“Aku ngarapka bala ba rumah panjai anang tebiuh runding mendingka jaku ba radio nya laban kitai nemu semina perintah BN aja ulih ngangkatka pengidup rayat,” ku iya madahka baru.

Bela bisi datai maya pengawa tu iya nya, Menteri ba Opis Kepala Menteri Tan Sri Datuk Amar Adenan Satem, Sapit Direktor Pelin JTS Sarawak Ibrahim Lumpu, Pemesai JTS Sibu Peggy Ronin Edin, ADUN Nangka Annuar Rapaee, Residen Sibu Sim Kok Kee, Sekretari Politik Kepala Menteri Andrew Shilling, Temenggung Sir Andrian Ringgau, bala pemancha enggau penghulu.

(Sumber:  Utusan Borneo, 6 Oktober 2012)