picture

News

 

2.6 juta ekar tanah NCR udah mujur disukat

Posted on 07 Mar 2023
Source of News: Utusan Borneo
BINTULU: Opis Tanah enggau Survei (JTS) Sarawak udah mujur nyukat 2.6 juta hektar Tanah Hak Adat Bumiputera (NCR) sechara perimeter di negeri tu kenyau ari taun 2010, pia ku Sapit Premier Sarawak Datuk Amar Awang Tengah Ali Hasan.
"Ari penyampau nya, 814,428 hektar tauka 2.01 juta ekar digazet lalu pengawa deka majak dipejalaika kena nentuka semua tanah NCR di negeri tu disukat sereta digazet," ku iya.
Iya bejaku munyi nya maya bejadi Pengerami Nyuaka  Warta Seksyen 6 Kanun Tanah Negeri enggau SuratPala Tanah Seksyen 13 enggau 18 Kanun Tanah Negeri Bagi Menua Bintulu di Auditorium BDA, kemari.
Menteri Pengeraja Asal enggau Pemansang Mengeri II ke mega Menteri Dagang Antarabansa, Industri enggau Beranakka Puku nya madah, pengudah Gazet Rizab Komunal Bumiputera dar baruh seksyen 6 Kanun Tanah Negeri dikeluarka, nangkanka nya renggat kedua deka dipejalaika. 
Ku Awang Tengah, nya nyengkaum kereja nyukat lot individu enggau ngeluarka surat pala tanah seksyen 18 Kanun Tanah Negeri (KTN) deka dipejalaika.
"Program tu mungkur  secara semua kandang menua enggau bagi menua di serata negeri nyengkaum semua Bumiputera ti bisi hak ke tanah NCR sida," ku iya.
Ku iya, asalka nya bisi bukti chukup, amat sereta nitihka undang - undang, nya ulih dipejalaika sereta nadai penanggul.
Ku iya, perintah bejalaika pengawa nyukat sechara lot individu nitihka peminta ti dikemendarka ke alai nya disukat sechara perimeter, digazet ari baruh seksyen 6 Kanun Tanah Negeri enggau kena nyendiaka diri minta tanah NCR nya.
"Naka ke diatu, bisi 57,703 lot rumah alai diau ari 386 buah genturung pendiau di serata Sarawak udah disukat.
"Ari penyampau nya bisi 53,824 lot udah dikeluarka surat pala tanah lalu sehari tu, aku nyuaka 65 surat pala tanah ngagai 65 iku nerima ungkup Kampung Baru Darat, Kampung Baru Laut, Kandang Kampung Sebiew enggau  Kampung Sebiew.
Maya pengerami nya mega Awang Tengah isi nyuaka Gazet Rizab Komunal Bumiputera (Betanam Betupi) Seksyen 6 KTN ngagai Kampung Nyalau, Gazet Rizab Komunal Bumiputera (Rumah Panjang) Seksyen 6 KTN ngagai Rumah Panjai Entika Samarakan, Rumah Suhaili Siba, Rumah Chali Ugok, Rumah Garena Pi, Rumah Labang, Rumah Janting enggau Rumah Ambong Atop ba Jalai Bintulu-Miri.
Sama bisi diserahka iya nya Tanah Pendam Batu-16 Gazet Rizab Komunal (Tanah Pendam) Seksyen 6 KTN enggau Gazet Rizab Perintah (Rumah Panjai) Seksyen 7 KTN TR Apee Banta, TR Francis Lagan enggau TR Sunggon Enchelum ba kandang menua Sungai Sap.
 
 


picture Polls
picture Announcement