News

 

Bisi 34 iku nerima pampas tanah RM1.3 juta

Posted on 10 Mar 2023
Source of News: Utusan Borneo
MUKAH: Bisi 34 iku penerima nerima pampas tanah RM1.3 juta ungkup Projek Jalai Alternatif Skim Kampung Petanak ba Ringkat Satu Menara Pehin Setia Raja ditu kemari.

Chek pampas nya disuaka Sapit Menteri Pemansang Mengeri enggau Pengeraja Asal Datuk Len Talif Salleh ngagai semua penerima oleh.
Maya pengerami nya mega, iya bisi nyuaka Gazet Rizab Komunal Bumiputera Seksyen Enam Kanun Tanah Negeri ngagai komuniti Iban di Ulu Sikat, Batang Mukahti mingkur pemesai tanah 46.67 hektar.

Sama bisi ngulu pengerami nya,Kaban Kunsil Negeri Tellian, Royston Valentine.

Lebuh ke bejaku, Len madahka perintah negeri ke bendar iya terus komited ba pengawa nyukat tanah Hak Adat Bumiputera (NCR) nengah inisiatif baru berengkah ari taun 2010.

"Nyentuk ke diatu, urung sejuta lebih hektar NCR disukat dalam kandang taun 2010 nyentuk ke 2023. Semua NCR dianggarka 1.6 juta hektar lalu nadai mayuh agi laluh nya ti deka disukat," ku iya.

Iya ngarapka kerejasama kelebih agi ari mensia mayuh ambika tau ngemuntangka pengawa nyukat nya.
Iya mega ngenadaika jaku tuduh sekeda orang ti madahka perintah enda ngakun tanah nya bisi orang ngempu, tang  nyata nya enda masuk akal sereta semina jaku tuduh ngapa.

"Perintah negeri megabisi mayuh perambu pemansang baka ngaga infrastruktur di serata Sarawak sekalika benung digaga tauka dalam perambu.
"Semua nya deka meri empas positif ngagai semua pemansang di negeri," ku iya.


Polls
Announcement