Abang Johari ngemataka pengawa betukar dokumen Persefahaman Perlanjutan Makmal Satelit 2026 entara JTS enggau Universiti Teknologi Malaysia (UTM) beserimbai enggau pengerami kena malam Hari Tiga. - Gambar UKAS

KUCHING: Opis Tanah enggau Survei (JTS) patut negapka guna pengawa mansik enggau meresa tanah enggau ubah ngagai chara bepelasarka data makit.

Premier Sarawak, Datuk Patinggi Tan Sri Abang Johari Tun Openg madahka chara tu beguna dalam nentuka pengawa ngatur ngempu tanah, meri pampas, premium enggau pekara bukai bekaul tanah ulih dipejalaika enggau betul sereta konsisten.

“Penambah pemansang infrastruktur, penumbuh baru mengeri enggau beranakka puku skala besai nyadika proses meresa tanah majak kompleks, lalu mega begunaka sukung data makit ti tegap.

“Proses ngempu tanah patut disukung ari pengawa meresa profesional, konsisten lalu ulih ditegika ngambi pemansang ulih dipejalaika engkeman ba maya nya lalu enda ngelengkaka hak pengempu tanah dalam nerima pampas ti enda bechiping,” ku iya nengah penerang ti diambi ari media rama rasmi Facebook, Sarawakku.

Iya madah munyi tu lebuh ti bejaku maya Pengerami Bejadi Nutup Hari Inovasyen enggau Integriti Tanah enggau Survei Sarawak (HIITS) 2026 di sebuah hotel ditu, kena malam Hari Tiga.

Nitih ku iya, pengawa meresa premium ungkup variasyen kompeni hak pengempu, meri pengempu terus, ngemaru 'land lease' sereta projek pemansang ti mega patut ngira ubah dagang enggau potensyel pemansang ba sekeda kandang menua.

Beserimbai enggau tu, ku iya, JTS patut nyingkang jauh agi ngagai chara 'data-driven valuation' enggau ngena memanah data transaksyen, penerang geospatial sereta analitik makit ti berurun agi.

“Aku dekaka guna pengawa meresa tu nyingkang jauh agi nuju data-driven valuation enggau nguna data transaksyen, penerang geospatial sereta analitik makit ti berurun agi,” ku iya.

Abang Johari madah, chara tu ukai semina ulih ngangkatka pemetul chara meresa, pia mega ulih mantu ngelengkaska pemutus perintah, ngurangka penyarut sereta nentuka asil nengeri diperatika enggau engkeman.

Ku iya, pemansang infrastruktur mega meri empas ngagai rega tanah, berindik ari tu ubah rega ti nyadi berindik ari pemansang ke patut dikemeratka enggau sistematik agi.

“Lebuh kitai ngemansangka tanah, lebuh kitai ngemansangka jalai, udah tentu rega tanah deka nambah,” ku iya.

Nitih ku iya, chara bepelasarka data tu mega beguna dalam nentuka pemutus bekaul tanah ulih ditegika bepelasarka penerang batang tuju, kelebih agi lebuh tu ngaul pemerat guna tanah enggau pemerat pemansang nengeri.

Ku ya madah, chara negapka sistem meresa tu iya nya sebagi ari pengeransing JTS nentuka pengawa administrasyen tanah mansang moden ngambika pemutus bekaul tanah ulih digaga enggau lengkas, betul sereta bepelasarka bukti.