Abang Johari (tiga kanan) begulai enggau temuai dipebasa ke bukai maya ngaga simbolik bejadi Pengerami Nutup Hari Inovasyen enggau Integriti Tanah enggau Survei Sarawak (HIITS) 2026. Gambar Opis Premier Sarawak

KUCHING: Lebih 1.25 juta hektar tanah Hak Adat Bansa Asal (NCR) udah disukat di selampur Sarawak naka 31 Ogos 2026, tang pengawa tu patut diteruska nyentuk proses ngesah, ngerejista enggau ngemansutka hak pengempu ulih diputarka enggau komprehensif.

Premier Sarawak Datuk Patinggi Tan Sri Abang Johari Tun Openg dalam Facebook rasmi iya Sarawakku madah, perintah meruan komited ngelengkaska pengawa nyukat enggau ngemansutka hak pengempu tanah NCR dalam nentuka hak rayat ulih diatur dokumentasyen ti berurun agi.

“Aku dipadahka nyentuk 31 Ogos 2026, lebih 1.25 juta hektar tanah NCR udah disukat di selampur Sarawak nengah Program Nyukat Tanah NCR Inisiatif Baru,” ku iya.

Iya madah munyi tu lebuh ti bejaku ba Pengerami Bejadi Nutup Hari Inovasyen enggau Integriti Tanah enggau Survei Sarawak (HIITS) 2026 di sebuah hotel ditu, kena malam Hari Tiga.

Nitih ku iya, tikas pengulih tu enda ulih dipeda ba lumur aja laban tetiap lot enggau garis entara tanah ngaul diri sebilik, sejarah, pun penatai pemisi sereta pemujur rebak ti nangkanka tu jemah ila.

“Pengawa ti udah tu patut dipadahka ngagai pengawa mutarka 'end-to-end' ari nemu bagi kandang endur, nyukat enggau ngesahka garis entara nyentuka mih ke dokumentasyen, pengawa ngerejista sereta ngemansutka hak pengempu,” ku iya.

Abang Johari madah, pengawa nguna teknologi ulih ngelengkaska proses nyukat sereta ngangkatka pemetul data tanah, tang kaul pengempu tanah, komuniti enggau raban ti bekaul endang beguna dalam nentuka proses dipejalaika enggau lanchar.

Ku iya, penerang proses enggau komunikasyen ti manah ulih ngurangka penyarut, ngangkatka tikas pechaya komuniti sereta nentuka hak rayat terus dijaga.

Ku iya madah, chara tu patut nyadi sebagi ari pengeransing dalam pengawa administrasyen tanah ti moden ngambika pengawa ngatur NCR ukai semina mekuh ngagai pengawa nyukat, tang patut nentuka proses pengudah nyukat ulih ditembuka enggau manah.

“Teknologi ulih ngelengkaska proses tang kaul enggau pengempu tanah, komuniti sereta raban ti bekaul mega beguna,” ku iya.

Iya nyemetak madahka pengawa mutarka isu tanah NCR patut dipejalaika enggau berurun, lurus sereta enda bechiping setipak enggau tanggungpengawa perintah nentuka hak sereta pemerat rayat terus dijaga.