Len lebuh bejaku ba pengawa minta pengempu tanah NCR enda nyual tanah nya.

SARIKEI: Tanah Hak Adat Bansa Asal (NCR) patut dikemerat nyadi aset ekonomi timpuh panjai ti ulih meri asil penatai pemisi ngagai ruang bilik, ukai dijual kena ngulihka penguntung ke jampat tauka timpuh pandak.

Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh madahka, udah bisi hak ngempu tanah nya meri awak ngagai rayat ngulihka pengidup ti meruan agi ngena chara bejalaika aktiviti betanam betupi enggau pemansang tanah ti bisi perambu manah.

Nitihka iya, asil nyual tanah semina meri penguntung enda lama, tang enti tanah nya dikemansang sereta diatur enggau manah, nya ulih meruan nyadi pun penatai pemisi ngagai ruang bilik.

"Tiap bidang tanah ke diterima mesti dijaga, laban rega deka majak niki enti pengempu tanah nya ulih ngereja enggau produktif," ku iya bepelasarka ripot berita Unit Komunikasi Awam Sarawak (UKAS)), sehari tu.

Iya madahka pekara nya lebuh bejaku ba Pengawa Nyuaka Surat Pala Tanah Seksyen 18 Kanun Tanah Sarawak ba menua Ulu Sarikei ti diatur ba Palan Opis Perintah Sarawak, Bagi Menua Sarikei ditu, kena Hari Lima tu tadi.

Nambah nya Len madahka perintah bisi nyediaka mayuh macham bansa bantu belanja, insentif enggau meri sanding penemu teknikal dikena meransang pengawa ngemansangka tanah NCR.

Ku iya, pengawa nya setipak enggau polisi Perintah Sarawak ti deka ngenegapka pengawa ngeluarka pemakai menua tu empu lalu ulih ngurangka ari bepanggai ngagai pemakai ari luar menua.

"Utai tanam baka padi, jagung enggau komoditi pemakai ti bukai bisi potensyel besai dikena nyungkakka penatai pemisi rayat menua pesisir nyema dikemansangka enggau meruan," ku iya.

Dalam timpuh ti sama, iya madahka ngena kereban tauka teknologi moden dalam sektor betanam betupi ulih nambahka efisyen tauka penyikar pemansut , kelimpah ulih mantu napi penanggul suntuk pengereja pengawa sereta umur ti majak tuai.

Iya ngarapka pengawa nyuaka lebih 300 lot tauka bidang tanah ba pengerami nya ulih meransang pemansang ekonomi ruang bilik, kelimpah ari nentuka tanah nya tetap nyadi aset ti berega ke ulih ditampung rebak dudi.

Ba pengerami ti sama, bisi 103 iku penerima ari Ulu Sarikei nerima 137 iti surat pala tanah ari baruh Seksyen 18 KTN, ti mandangka pengawa Perintah Sarawak keran ngenegapka hak rayat ngempu tanah.

Surat pala tanah nya ukai semina udah netapka sapa ke ngempu tanah nya, tang meri jamin ngagai pengempu nya ulih ngatur, ngemansang enggau ngetanka tanah nya ngambi bisi diariska ngagai rebak dudi.

Iya mega madahka, surat pala tanah ukai semina dokumen administrasyen aja, tang tanda hak ti likun enggau nentuka sapa ngempu tanah nya dudi hari.

"Enti pala tanah tu udah ba jari kita ke nyadi pengempu, kita bisi hak nyaga, ngatur enggau meri tanah nya ngagai orang ke nampung kita jemah ila," ku iya ti mega Kaban Kunsil Nengeri (ADUN) Kuala Rajang.

Nitihka Len, semua 103 iku penerima nya  nyengkaum komuniti ari bansa Melayu enggau Iban ke diau mendam dalam Kunsil Nengeri (DUN) ke diarika iya sereta Parlimen Tanjung Manis.

Surat pala tanah nya beguna amat laban ulih mantu ngatur rikod ngempu ke nyengala agi sereta nyeliahka ari penanggul beserak tauka berebutka entara tanah jemah ila.