Awang Zamhari lebuh bejadi Logo Level Up baru ba pengerami nya kena Hari Empat

KUCHING: Opis Tanah enggau Survei (JTS) Sarawak deka nentuka terus ulih ngemudahka pengawa ngenataika servis ti bekualiti lalu ukai nyadi penekul pemansang ke meri pemaik sereta pengelantang ngagai rayat enggau nengeri tu.

Direktor iya, Datu Awang Zamhari Awang Mahmood madahka, tanggung pengawa opis nya diatu signifikan amat setipak enggau pemansang nengeri ti majak chakah nyengkaum dalam pengawa ngatur tanah dikena bejalaika projek strategik, pemansang ekonomi baru, ngatur pengeraja asal sereta pemansang kandang menua darat enggau maritim.

"Kitai enggai opis tu nyadi penekul pemansang. Tang kitai patut nyadi fasilitator tauka pemudah pengawa ke ulih meri servis enggau lengkas, efisyen, bisi integriti enggau efektif ke pemanah enggau penyulut Sarawak," ku iya.

Iya madahka pekara nya lebuh bejaka ba 'Program Level Up: Memperkasakan Nadi Perkhidmatan' ke dipasuk 300 iku Kumpulan Pelaksana, ti diatur 1 ngagai 2 Julai tu tadi, ba sebengkah hotel ditu.

Iya nyemetak madahka tiap iku pengereja pengawa enda ngira pangkat endang patut bejalaika tanggung pengawa beguna dikena nentu operasyen enggau servis ke diberi ngagai rayat dipejalaika enggau lanchar.

Iya madahka, Kumpulan Pelaksana nyadi pengerembai semua ekosistem JTS Sarawak, kelimpah ari nyukung operasyen organisasyen.

"Anang sekali nganggap pengawa ke dipejalaika nya mit. Enda ngira sekali ke nuan ba kaunter, betemu enggau rayat, ngatur fail, deriba perengka pengangkut tauka nyukung pengawa adminstrasyen, semua endang nyadi penyaup ti signifikan ngagai sistem meri servis ti efisyen, bisi integriti enggau efektif," ku iya.

Ku iya, pengandal rayat ngagai kualiti servis ke majak nambah begunaka tiap iku pengereja pengawa JTS Sarawak ti seruran ngenegapka kompetensi, ngemeranka teknologi sereta ngentapka runding kritikal enggau beratka integriti.

Belalauka aspirasyen 3R (Revisit, Rethink and Recharge) Pengawa Perintah Nengeri Sarawak, iya meransang semua pengereja pengawa opis nya terus nambahka penemu, pengelandik enggau pemujur kereja nyadi budaya dikena nentuka JTS Sarawak mengkang relevan dalam nyukung agenda pemansang nengeri.

Bekaul enggau Program Level Up ti udah taun ke-2 diatur, mandangka komitmen ti enda ngetu ari JTS Sarawak dalam pengawa negapka kompetensi, pemanah ulah diri, integriti enggau profesionalisma raban pengereja ke nyadi tulang belakang ngenataika servis bekualiti ngagai rayat.

"Begunan, teknologi enggau sistem semina penyungkak, tang pengering tauka penegap ke bendar opis bepanggai ngagai pengereja pengawa nya empu.

"Nya kebuah program tu nyadi pelasar ti beguna dikena ngangkatka kompetensi, profesionalisma enggau penyikap raban ti ngereja pengawa napi pemar ke benung nyadi," ku iya.

Ba pengerami ti sama, dipenyadi logo baru Program Level Up enggau pengawa nyuaka anugerah ngagai penyereta ti nyulut, iya nya Saidie Ludin ari JTS Samarahan nerima Anugerah Kepimpinan Terbaik; Muhammad Ramadani Suhaimi (Peserta Paling Supporting) enggau Kumpulan NJC nyadi Kumpulan Terbaik.