Awang Tengah (bediri, enam ari kiba) sereta pemesai bukai begambar bebala mayuh enggau champion KIK ditu, kena malam Hari Empat.

KUCHING: Pemujur inovasyen ti ditengkebang Opis Menteri Pemansang Mengeri enggau Pengeraja Asal (MUDeNR) ngena pelasar Konvensyen Raban Inovatif enggau Kreatif (KIK) terus diaku pengudah ti matak ati dalam aum Majlis Tanah Negara ti bechairmanka Menteri Besai.

Nitih ke iya, entara pemujur besai ti dijapai ari budaya inovasyen KIK nyengkaum bejalaika sistem eSPA enggau inisiatif 'Same Day Registration' ti bulih setipikit ISO, kelimpah ari pengawa ngemansangka sistem matau ba pengawa nyukat tanah enggau ngambi pulai tanah.

"Entara pemujur besai asil ari penyereta dalam KIK ti udah dikena nambahka pemanah pengawa meri servis, iya nya bejalaika sistem eSPA enggau inisiatif 'Same Day Registrastion' ke udah bulih setipikit ISO seraya sekeda intervensi bukai baka sistem pematau ba pengawa nyukat tanah enggau ngambi pulai tanah mega mujur dikemansangka.

"Semua tu asil ari budaya inovasyen ti dikena KIK, lalu lebuh aku ngulu aum Majlis Tanah Negara ti bechairmanka Menteri Besai, mayuh sida tekenyit lebuh dipadahka Sarawak udah mujur nambahka pemanah pengawa meri servis nyentukka pekara ngerejista tanah ulih tembu dalam timpuh sehari," ku iya bepelasarka ripot Unit Komunikasi Awam Sarawak (UKAS).

Awang Tengah madahka, pemujur nya udah ngangkatka Sarawak nyadi nengeri keterubah ba Malaysia ti mujur bejalaika sistem pengerejista tanah dalam timpuh sehari, seraya mandangka nya chara inovatif ti dikemeranka dalam sektor perintah nengeri chukup semitan.

Berebak enggau tu, iya bekunsi pemujur inovasyen SaraPeg ti dikemansangka Opis Tanah enggau Survei (JTS) Sarawak nyadi entara penyulut pemadu ngemegahka ati dalam sejarah ngatur KIK ba opis nya.

Nitih ke iya, SaraPeg iya nya inovasyen keterubah ti mujur nyediaka semua singkang pemansang KIK ti berengkah ari meri penemu, pemansang produk, pengerejista paten, dikeluarka ngena chara besai nyentuk ngagai renggat komersial.

"Siti agi pemujur ke patut diaku sereta diangkatka iya nya SaraPeg, inovasyen ti ditengkebang JTS Sarawak. Tu inovasyen keterubah opis nya ti mujur nyediaka semua singkang pemansang KIK ti berengkah ari meri penemu, pemansang produk, pengerejista paten, dikeluarka ngena chara besai nyentuk ngagai renggat komersial," ku iya.

Bisi datai, Sapit Menteri MUDeNR, Datuk Len Talif Salleh; Sekretari Mendam MUDeNR, Datu Abdullah Julaihi; Direktor JTS Sarawak, Datu Awang Zamhari Awang Mahmood enggau bala pemesai bukai.