Awang Zamhari nerangka silik bekaul enggau sistem 'Kadaster Marin' ngagai raban pengarang berita pengudah meri pugu penemu ba 'Surveyors' Congress 2026' ditu, sehari tu.

Dikarang Rengayan Labang

KUCHING: Sarawak deka nyadi nengeri ke dulu mungkal sistem 'Kadaster Marin' ba Malaysia laban perintah nengeri diatu benung dalam proses ngaga 'Pelan Hala Tuju Kadaster Marin' 2026-2028, ti ulih nyadi kereban dikena ngatur ekonomi biru enggau nyaga pemeruan tasik.

Direktor Opis Tanah enggau Survey (JTS) Sarawak, Datu Awang Zamhari Awang Mahmood madahka, pengawa bejalaika 'Kadaster Marin' ba Sarawak deka nyengkaum semilan skop pengawa ti udah berengkah dipejalaika dalam timpuh 2026-2028, ngambika pengawa ngatur kandang menua enggau pengeraja asal tasik ulih dipejalaika enggau lebih efisyen sereta komprehensif.

Ku iya, inisiatif baru nya ti dipejalaika nengah kerejasama JTS Sarawak enggau Universiti Teknologi Malaysia (UTM), nyadi sistem begulai ba pengawa ngatur garis entara menua maritim, data ruang tasik, hak, nagang enggau tanggung pengawa (3R)ba serata mua tasik, 'water column' enggau lansar tasik.

Nitih ke iya, 'Kadaster Marin' sebengkah kereban ti sebaka enggau kadaster tanah tang diubah ungkup rampa menua tasik ti dinamik enggau mayuh lapik ti beguna amat sereta dikena nyaga pemerat guna tasik.

"Ba Sarawak, pekara tu beguna amat laban tu nyukung pengawa ngatur ti meruan, setipak enggau 'Matlamat Pembangunan Mampan Pertubuhan Bangsa-Bangsa Bersatu (SDG) 14 (Kehidupan di Bawah Air)', ti nyediaka mekanisme dikena matau enggau ngatur peminta ba ruang tasik sereta nyaga rampa menua enggau manah agi.

"'Pelan Hala Tuju Kadaster Marin' kitai ari taun 2026 ngagai 2028 dikena netapka semua pekara bekaul enggau 'Kadaster Marin' ti nyengkaum undang-undang, pengawa ngerejista enggau proses ngekar ke nyadi batang komponen lebuh kitai ngenang 'Kadaster Marin'.

"Lalu ba taun 2029, kitai deka bejalaika semua nya, ngena utai ke dikumbai kitai survey 'Kadaster Marin'. Diatu kitai benung dalam proses nembuka langkar kereja nya nyengkaum undang-undang ngekar," ku iya ti mega nyadi Chairman Lembaga Juruukur Tanah Sarawak. 

Iya nerangka pekara nya lebuh dirandau raban pengarang berita pengudah meri pugu penemu ba pengerami bejadi 'Surveyors' Congress 2026' ti ngena rambai jaku 'From Land to Legacy: Surveyors as Stewards of a Sustainable Sarawak' ti diatur Royal Institution of Surveyors Malaysia (RISM) ditu, sehari tu.

Dulu ari nya, lebuh bejaku meri pugu penemu Awang Zamhari madahka, inisiatif baru nya ti dipejalaika nengah kerejasama entara JTS Sarawak enggau Universiti Teknologi Malaysia (UTM) mega bisi kaul enggau karbon baka CCUS jauh ari pantai.

Ku iya, sistem nya mega mantu nyediaka potensyel ekonomi biru ngena chara nentuka hak ngempu enggau ngena pengeraja asal tasik, ti beguna ngagai pemansang ti meruan ba kandang tebing tasik enggau jauh ari pantai.

"Sistem 'Kadaster Marin' netapka garis entara menua maritim enggau zon. Tu mantu ngatur bidang kuasa ti enda terang enggau ngurangka konflik entara aktiviti marin ti besemekih," ku iya.

Kelimpah ari nya, inisiatif tu mega ngemuntang integrasyen perambu ruang darat enggau tasik, nuju ngagai langkar kereja ruang/spatial) 3D enggau mega 4d ti komprehensif.

"'Marine Cadaster' meri awak ngagai kitai ngena ruang tasik 3D. Laban peta tauka 'parcel' betukuh 3D, nya nyengkaum pengawa nyukar enggat ngatur ruang air, dasar laur enggau sub-dasar tasik, ke lalu nyediaka pengawa ngaga kar enggau ngerikod hak enggau kepentingan ti betul ba ruang tasik ti kompleks," ku iya.

Sama bisi datai, Sapit Presiden RISM, Prof. (I) Sr Mohd Khairudin Abd Halim; Chairman Pengatur 'Surveyors' Congress 2026', Sr Ngo Chee Hong, enggau sida bukai.