Awang Zamhari (tengah) enggau Khairudin (tiga, ari kiba) sereta sida bukai begambar bebala mayuh ke pengingat ba pengerami 'Surveyors' Congress 2026' ditu, sehari tu. -Gambar Unit Perhubungan Awam JTS Sarawak

Dikarang Rengayan Labang

KUCHING: Sarawak terus nyingkang ngagai renggat global lebuh nengeri tu dipeda bisi potensyel nyadi rangkat tanda serantau dalam pengawa ngatur tanah, pemansang geospatial enggau ngatur pengeraja asal enggau meruan nengah pengawa ngatur 'Surveyors' Congress 2026'.

Sapit Presiden, Royal Institution of Surveyors Malaysia (RISM), Prof. (i) Sr Mohd Khairudin Abd Halim madahka, Sarawak ukai semina ngatur kongres tang benung ngengkahka diri ba renggat global, setipak enggau visyen Premier Sarawak, iya nya nengeri tu patut nyadi peneraju dalam bidang baka energi ti meruan, transformasyen digital enggau pengawa ngatur tanah ti progresif, kelimpah ari nyadi penyereta.

"Kongres sehari tu mandangka aspirasyen nya, ti nunjukka Sarawak sedia ukai semina deka mandangka penyulut, tang deka meri penyaup ke besai reti ngagai global kelebih agi bakani tanah, data enggau pemansang ulih diatur enggau penuh tanggung pengawa ti nguntungka rebak dudi.

"Kongres ke baka tu meri peluang betukar penemu ngelui antara menua, bekunsi chara pemadu manah global enggau ngenegapka penyambung profesional ngelui ari Malaysia," ku iya.

Iya madahka pekara nya lebuh bejaku ba 'Surveyors' Congress 2026' ti ngena rambai jaku 'From Land to Legacy: Surveyors as Stewards of a Sustainable Sarawak' ti diatur Royal Institution of Surveyors Malaysia (RISM) ditu, sehari tu.

Bejaku baru iya madah dalam penyakah pemansang enggau pemar ti nyadi ketegal ubah gaya hari, tanah enggau data diatu nyadi aset strategik ti bejalaika tanggung pengawa beguna dalam pemansang infrastruktur, perambu mengeri, ubah energi enggau pengawa ngatur rampa menua.

Nambah nya, iya madahka pemeruan ukai pekara ke dipilih sereta ukai agi dikumbai komponen 'nilai tambah', tang, diatu nyadi tanggung pengawa besai.

Ku iya, juru survei bejalaika tanggung pengawa ti beguna amay ba renggat pemungkal laban data dikena ngelanggur, analisis dikena ngaga turai tukuh sereta input dikena bejalaika pemansang nya.

"Aku enggau nyemetak deka madah, data ti lemi ngasuh pemutus nyadi lemi, lalu pemutus ti lemi nya deka meri asil ti enda meruan.

"Nya alai tanggung pengawa ke dipegai kitai sehari tu besai agi enti dibandingka enggau sebedau tu. Kitai mesti ngeukuka data kitai betul, metodologi kitai tegap sereta lalau kita beratka tanggung pengawa enggau bepenemu jauh," ku iya.

Bisi datai Direktor Opis Tanah enggau Survey (JTS) Sarawak, Datu Awang Zamhari Awang Mahmood, enggau Chairman Pengatur 'Surveyors' Congress 2026', Sr Ngo Chee Hong, seret sida bukai.