KUCHING: Kampung Tebakang Bidayuh enggau Kampung Pichin ba Bagi Menua Serian nerima agih belanja sepenyampau RM70,000 ari baruh Program Tanggung Pengawa Rama Korporat (CSR) Opis Tanah Survei (JTS) Bagi Menua Serian.

Kaban Kunsil Nengeri (ADUN) Tebedu, Dr Simon Sinang Bada madahka, agih belanja nya diberi dikena mantu komuniti ba genturung pendiau nya ti tekeruga ketegal pengawa muai batu tauka pengawa ngelembang.

Nitih ke iya, pemeri nya ari BE Borneo Quarry Sdn Bhd pengudah Opis Menteri Pemansang Mengeri enggau Pengeraja Asal ngemendarka agih belanja sepenyampau RM70,000 ngagai dua bengkah genturung pendiau nya.

"Kitai meri pengaga ati sereta terima kasih ngagai JTS Bagi Menua Serian laban ti beratka pengelantang rayat genturung pendiau nya ti begunaka bantu.

"Aku ngarapka program baka tu ulih terus meri pemaik ngagai komuniti menua tu, kelimpah ari nanggam rat kaul enggau pemereti ati entara opis perintah, raban bansa enggau pengemeran industri," ku iya.

Iya madahka pekara nya ba pengerami nyuaka chek renggat keterubah taun 2026 Program CSR ke diatur ba Opis Residen Bagi Menua Serian kena Hari Dua.

Dr Simon bejaku baru madahka, program CSR nya inisiatif Perintah Sarawak begulai enggau kompeni pemegai lisin tauka 'tenemen mineral' ti dikeluarka JTS dikena mantu komuniti mengeri enggau menua pesisir ti tekeruga ketegal aktiviti muai batu tauka pengawa ngelembang.

Nitih ke iya, pengawa milih penerima agih belanja dipejalaika berenggat ninting taun dikena nentuka sama sebaka sereta bungkur komprehensif ngagai komuniti ti tekeruga ketegal pengawa industri.

"Sebedau tu, program CSR ti sama mega dipejalaika enggau kerejasama sekeda kompeni industri bukai baka Pendu Quarry Sdn Bhd enggau Magna Focus Sdn Bhd.

"Tu nyengkaum sekeda genturung pendiau penerima baka Kampung Plaman Payang, Kampung Tanah Puteh, Kampung Sebamban, Kampung Prutan di Serian sereta Kampung Endap ba Kota Samarahan," ku iya.