Abang Johari enggau bala bukai meda model Projek Samarahan Boulevard sehari tu. Gambar Chimon Upon

KOTA SAMARAHAN: Perintah Sarawak udah nemu bagi lebih 1,000 ikar tanah ba kandang menua tu enda jauh ari projek perambu Samarahan Boulevard deka dikemansang nyadi kandang endur gadung ti meruan.

Premier Sarawak Datuk Patinggi Tan Sri Abang Johari Tun Openg, madahka perintah benung bekerejasama enggau Opis tanah enggau Survei dalam ngemansangka kandang endur tu.

Nitih ku iya, kandang endur tu deka ditanam enggau pun kayu kelimpah nyadika tu palan rekreasyen ungkup mensia mayuh.

“Kitai begulai enggau Opis tanah enggau Survei udah nemu bagi kandang endur gadung pemesai 1,000 ikar enda jauh ari boulevard (Samarahan Boulevard).

“Kandang endur tu deka ditanam penuh enggau pun kayu kelimpah digagaka nyadi palan gadung ke alai endur mensia mayuh ulih jogging, eksesais lalu ngasaika pengelantang pengeraja asal,” ku iya lebuh ti bejaku maya bejadika pengerami Nasih Tanah Projek Samarahan Boulevard ditu, sehari tu.

Abang Johari nyemetak madahka iya nya palan gadung mengeri besai amai reti ungkup kualiti idup enggau meri chunto Hyde Park di London sereta kandang endur rekreasyen ba Menara Eiffel di Paris.

“Lebuh kita ke mengeri baka London, kita bisi Hyde Park, iya nya urung 5,000 ikar tanah gadung ke enda tau dikemansangka.

“Mengeri besai bukai ngembuan kandang ednur rekreasyen ti besai. Palan tu beguna laban idup mensia enda bepanggai ngagai pemansang komersial aja.

“Mensia mayuh begunaka oksigen ti manah lalu rampa menua ti gerai,” ku iya nerang.

Iya mega nambah iya nya kandang menua gadung Samarahan deka ditanam enggau spesies pun kayu menua tu empu dikena ngangkatka pemeruan pengeraja asal sereta pengelantang mensia mayuh.

“Kitai udah meda bakani pengawa nanam pun kayu tu ngangkatka aktiviti mensia mayuh. Ambika chunto, pengudah pun kayu ditanam besemak enggau Masjid Jamek, Perpustakaan Negeri enggau Reservoir Park di Kuching, mayuh agi orang ti pansut maya pagi enggau lemai laban deka eksesais.

“Pun kayu ngasilka oksigen enggau angin ti manah ke ulih ngangkatka pengerai enggau pengelantang,” ku iya.

Abang Johari nyemetak madahka pengudah kandang endur tu dituku tauka digazet nyadi kandang endur gadung mensia mayuh, tu enda uih ditukar ngagai pengawa pemansang komersial tauka palan pengentap pendiau semadi bisi pemendar ari Kunsil Nengeri (DUN).

“Pengudah kitai ngenukuka lebih 1,000 ikar tu nyadi zon gadung mensia mayuh, tu enda ulih dikena ungkup tuju komersial. Status tu semina ulih diubah enggau pemendar DUN,” ku iya nambah.

Iya madah, Samarahan Boulevard deka nyadi sebagi ari konsep Samarahan Park ti besai agi, ke dilangkar nyadi palan gadung enggau rekreasyen ikonik ungkup kandang menua tu.

Abang Johari madah, penumbuh ti chakah di selatan Kuching enggau Samarahan udah ngemitka bida entara kededua kandang menua, nyadika tu beguna dalam nyendiaka infrastruktur tikas dunya.

“Nyema kitai deka nyadi nengeri maju enggau besemekih ba renggat global, infrastruktur kitai mega mesti tikas 'first class',” ku iya.

Iya nambah, Tanjung Embang dilangkar nyadi hab servis baru ungkup pemeranak puku, temuai enggau rayat Sarawak, nyengkaum pemansang padang bilun antarabansa ke baru.

“Sekeda orang ti nanya lapa kitai begunaka padang bilun baru taja ke udah bisi agi bejalaika operasyen. Tang kitai ngelangkar ungkup jemah ila.  Kitai deka ngaga padang bilun ke pemadu manah di Asia enggau servis ti lanchar, besai sereta efisyen,” ku iya nambah.

Abang Johari nyemetak madahka Sarawak patut ngena sistem teknologi ti moden dalam nyadika Kuching enggau Samarahan tu hab penerebai bilun enggau servis serantau.

“Kitai deka Kuching enggau Samarahan nyadi hab ASEAN ukai semina ungkup Malaysia, tang ungkup semua rantau ASEAN,” ku iya.