Len (empat kanan) ngemataka Anyi (empat kiba) nyuaka surat pala tanah Seksyen 18 KTN ngagai siku ari penerima di Sibu, kena Hari Empat.

SIBU: Pengawa nyuaka gazet, surat pala tanah enggau chek pampas tanah ukai semina pekara administratif tauka atur perintah aja, tang siti pengaku ngagai kerejasama sida dalam nentuka pemujur pengawa nyukat tanah Hak Adat Bumiputera (NCR) ari baruh insiatif baru perintah.

Sapit Premier Sarawak, Datuk Amar Awang Tengah Ali Hasan nyemetak madahka, penatai 231 iku penerima ba pengerami nyerahka dokumen nya ngayanka tanah ukai semina aset fizikal aja tang nyadi kedap pengidup enggau pesaka tiap ruang bilik.

Nitih ke iya, kandang menua Lemangan/Bekakap, Bawang Assan enggau Jalai Bawang Assan/Tanjung Manis di Sibu udah disukat sereta digazet dalam bulan Jun 2025 ti mungkur urung 807 hektar hektar (1,994 ekat) pemesai.

"Nambah nya, kandang menua Tebalong Batang Oya di Selangau ti pemesai urung 1,042 hektar (2,576 ekar) pemesai mega udah disukat sereta digazet dalam bulan ti sama.

"Sehari tu, bisi 27 iku tuai rumah ari dua bengkah kandang menua nya deka nerima gazet tanah NCR sida iya empu," ku iya.

Awang Tengah madahka pekara nya dalam teks jaku iya ti dibacha Sapit Menteri Pemansang Mengeri, Administrasyen Tanah enggau Rampa Menua, Datuk Len Talif Salleh, ti ngarika iya nyuaka dokumen nya ke diatur ba Kompleks Islam Sibu ditu, kena Hari Empat.

Nambah nya, pengawa nyuaka surat pala tanah Seksyen 18, Awang Tengah madahka, kandang menua Pasai Siong udah digazet ari baruh Seksyen 6 dalam taun 2013 enggau pemesai urung 5,904 hektar (14,596 ekar), sebedau pengawa nyukat individu dikemendarka ba taun 2017.

Lalu kandang menua Ngemah, Kanowit ti digazet ba taun 2017 enggau pemesai 10,047 hektar (24,828 ekar) mega udah dikemendar disukat individu ba taun 2021, ku iya.

Kandang menua Nanga Dap enggau Mapai di Kanowit ti digazet ari baruh Seksyen 6 Kanun Tanah Negeri (KTN) ba taun 2023 ti mungkur 5,283 hektar (13,054 ekar), ku iya, udah mega dipejalaika pengawa nyukat individu ba taun ti sama.

"Lalu kandang menua Nanga Tanyit, Selangau udah digazet dalam taun 2016 enggau pemesai 30,189 hektar (74,596 ekar) enggau nyukat individu dikemendarka ba taun 2017.

"Sepenyampau 195 iti surat pala tanah Seksyen 18 ti mungkur pemesai urung 397.84 hektar (983 ekar) deka disuaka ngagai 131 iku penerima," ku iya.

Beserimbai enggau pengerami nya mega, bisi diatur pengawa nyuaka chek pampas tanah ngagai pengempu tanah ke bisi kaul enggau projek ngaga jalai baru nyambungka Teku-Pasai Siong nuju ke Kemuyang, Sibu.

Nitih ke Awang Tengah, projek rayat ti dipejalaika Opis Kereja Raya (JKR) Sibu nya enggau pampas sepenyampau RM4,487,903 ti mungkur 76 bidang tanah sepemesai 28.75 hektar, ti nyengkaum tiga lot Tanah Rizab Komunal Bumiputera, empat lot Tanah NCR enggau 69 bidang tanah bisi pengempu ti diempu 170 iku penerima.

"Tuju besai ngaga jalai tu dikena muka jalai baru ari Kemuyang ke Teku-Pasai Siong, seraya lalu nyediaka alternatif pejalai ti pandak agi enggau lantang ngagai peranak," ku iya.

Awang Tengah beterima kasih ngagai semua pengempu tanah ketegal ti udah meri kerejasama sepemanjai proses ngambi ngempu tanah, lalu ngarapka projek nya dipejalaika enggau mujur sereta meri penguntung ngagai peranak enggau penguna jalai jemah ila.

Sama bisi datai ngagai pengerami nya Kaban Kunsil Nengeri (ADUN) Tamin, Ir Christopher Gira Sambang; ADUN Ngemah, Anyi Jana; enggau bala pemesai opis perintah ke bukai.