KUCHING: Peranak di Lempaong Anyut di kandang menua Paku, Betong ti lama udah nganti ngesahka hak ngempu tanah Hak Adat Bansa Asal (NCR) deka nyadi nyata oengudah 2,110 hektar tanah sida tu udah dikemendarka dalam proses nyukat.

Unit Komunikasyen Perintah Sarawak (UKAS) ngeripotka Sapit Premier Sarawak Datuk Amar Douglas Uggah Embas madah, pemendar tu ngaul peminta ari baruh Seksyen 6 sebedau diteruska ngagai meri pengempu individu ari baruh Seksyen 18 Kanun Tanah Nengeri.

“Opis Tanah enggau Survei udah meri licha bekaul enggau peminta sida ari baruh Seksyen 6. Enggau andal ati kitai madahka tu udah dikemendar.

“Proses nyukat deka berengkah ngenga Seksyen 6 lalu pengudah nya diteruska ke Seksyen 18,” ku iya mebuh ti datai Licha Inisiatif Baru Tanah Hak Adat Bansa Asal (NCR) di Rumah Lempaong Anyut, Paku, Spaoh kena Hari Minggu nyin tadi.

Nitih ku Opis Tanah enggau Survei (JTS), licha kaul pengawa tu mega bisi meri penerang ti silik bekaul enggau proses baru nyukat tanah NCR ti ngemeratka ubah ari Seksyen 6 ke Seksyen 18, lalu mega ngelengkaska pemansut hak pengempu individu ngagai pengempu ti sah.

Inisiatif tu iya nya sambung projek keterubah di Ulu Paku lalu diatu dikerembaika ke ngaul tujuh rumah panjai di kandang menua Anyut, iya nya Lempaong Anyut, Lingit, Engkerabai, Jitu, Nanam, Udau enggau Sungai Rian.

Dalam sesi dialog begulai enggau peranak, bala ketuai bansa enggau komuniti di kandang menua tu udah diberi peluang mantaika tanya lalu bulih penerang bekaul enggau chara baru nyukat tanah NCR.

Uggah nyemetak madahka iya nya pengawa tu ngayanka penyiru enggau pengelurus perintah Sarawak dalam ngenegapka pengempu tanah adat.

“Perintah GPS seruran mantu pengempu tanah NCR. Tanah adat ke bedau bisi 'title' deka diberi 'title'. Tu mih kelai komitmen perintah,” ku iya.

Pia mega, iya ngansak peranak dalam nentuka kerejasama rat dalam komuniti dikena nyeliahka laya ke ulih ngelubahka proses nyukat enggau nukar status pengempu tanah.

“Aku ngarapka peranak ulih bekerejasama enggau nyeliahka laya ngambika pengawa nyukat enggau proses nukar tanah ulih dipejalaika enggau lanchar,” ku iya.