KENANG BEREGA... Al-Sultan Abdullah, Tunku Azizah Aminah, Tuai Pemegai Menua (TYT) Sarawak, Tun Pehin Seri Dr Wan Junaidi, Toh Puan Fauziah, Premier Sarawak, Datuk Patinggi Tan Sri Abang Johari enggau Datuk Amar Fadillah Yusof begambar ungkup kenang enggau tim Landas Azam Kasihnya Warisan 3. - GAMBAR MOHD ALIF NONI

KUCHING: Sultan Pahang, Al-Sultan Abdullah Ri’ayatuddin Al-Mustafa Billah Shah dibasa nyua Trofi Raja Sungai ngagai tim Landas Azam Kasihnya Warisan 3 pengudah dipadu nyadi champion Regata Sarawak 2025.

Ngenulu tim bukai ba 30 Pengayuh Lelaki Raja Sungai Trofi TYT (Kategori Lokal) nengah rikod tujuh minit 13.63 sikin, tim nya mujur mai pulai perais besai RM30,000.

Nangkan nya, tim Lembaga Kemajuan Bintulu (BDA) menggi penuduk kedua nerima perais RM20,000 nengah rikod tujuh minit 17.90 sikin. Dientudi, tim Bedilku Seri Putih (Adidas) bulih penuduk ketiga nengah rikod tujuh minit 18.66 sikin mega bulih RM10,000.

Seraya, Landas 5 neruska dominasyen kelab nya pengudah nyadi champion nengah rikod enam minit 48.92 sikin seraya bulih RM20,000 ungkup 30 Pengayuh Lelaki Trofi Antarabansa Borneo (Kategori Tebuka).

Lalu tim Landas 1 bulih penuduk kedua nengah rikod enam minit 50.34 sikin mai pulai RM15,000.

Tim Sinaran EF Adison Sambas ari Indonesia enda pulai jari puang pengudah bulih penuduk ketiga nengah rikod 6 minit 51.02 sikin seraya nerima RM10,000.

Ke rikod, kededua lumba nya penyauh 1.8 kilometer ba Tebing Ai Kuching mandangka semangat beraban ba Sungai Sarawak sepanjai tiga hari diatu belabuh ari 31 Oktober nyentuk 2 November tu tadi. – ZAHID ZAKI