Abang Johari (kanan) begambar kenang enggau pengari tim ti bulih penuduk ba Kategori Sakai 20 Lelaki Lumba Regata Pesta Simunjan 2025. - Gambar Penerangan

KUCHING: Perintah Sarawak deka ngaga benteng baru di Tebing Sungai Simunjan ti reti nya deka ngaga Waterfront Simunjan ti ngaul agih belanja lebih RM100 juta.

Pekara tu udah dipadahka Premier Sarawak Datuk Patinggi Tan Sri Abang Johari Tun Openg lebuh ti bejaku maya Pengerami Nutup Pesta Simunjan 2025 di Simunjan, sehari tu.

Nitih ku iya, perambu projek tu diatu agi ba renggat nentuka langkar lukis lalu deka dikemansangka ngena belanja perintah nengeri sereta ngena teknologi Building Information Modeling (BIM).

Iya madahka projek tu iya nya chara tampung ari inisiatif ke suba ti enda tentu manah laban bisi pengelemi struktur pemun benteng lama.

“Suba kitai udah ngaga benteng, tang tu enda ulih tan ari arus sungai laban piling enda tama ke dalam.

“Nya alai kitai deka ngaga benteng baru ngena belanja Sarawak empu,” ku iya lebuh ti ditanya pengarang berita pengudah tembu Pengerami Nangguh Pesta Simunjan 2025 di Simunjan kena Hari Minggu.

Abang Johari madahka perintah nengeri deka mansik baru gaya ngaga lalu bejalaika projek tu ngena chara teknologi baru ke ulih tan ari pangka ai sungai ti deras lalu nentuka tu tan dalam timpuh ti lama.

“Teknologi ti dikena sekali tu tegap agi laban ngira peneras ai sungai. Benteng ukai semina tan ari tanah tusur, tang mega dikena ngemanahka landskap Simunjan,” ku iya.

Ku iya madah, pemansang pengawa tu mega deka ngubah landskap tebing sungai nyadi kandang endur rekreasyen enggau pematak temuai ti baru, enggau perengkaguna infrastruktur ti meri pemaik ngagai peranak di kandang menua tu.

Dulu agi ari nya dalam jaku iya Abang Johari madahka perintah nengeri ngagihka RM100 juta dikena ngangkatmanah Waterfront Simunjan.

“Nyema di Kuching bisi waterfront, di Simunjan mega deka bisi waterfront, enda lama agi,” ku iya ti mega Kaban Kunsil Nengeri (ADUN) Gedong.

Beserimbai enggau tu, Abang Johari madahka perintah Sarawak komited ngena semua teknologi enggau pakar ti pemadu baru dalam ngemansangka sektor betanam betupi.

Iya madahka sida ti bekaul dalam sektor tu nyengkaum raban ti betanam betupi enggau berikan kelebih agi rebak nembiak mesti dipatihka enggau chara sereta pengelandik betanam baru.

Beserimbai enggau pengeransing tu, iya madahka rayat Sarawak ti mujur bulih palan di univerisiti menua tu, bayar penama rejista sida deka dibayar perintah Sarawak.

“Kitai (perintah nengeri) deka mayar bayar rejista belajar ungkup 10,000 nembiak Sarawak ti bulih palan belaajr di institusyen pelajar tinggi menua tu baka Curtin (Universiti Curtin Malaysia-Miri), Swinburne (Swinburne University Of Technology Kampus Sarawak) sereta i-CATS enggau CENTEXS.

“Ambis nadai RM12 bilion deka diagihka ungkup nembiak kitai dalam timpuh tiga taun belajar. Lebuh udah tembu belajar ila, sida deka ngena nama ti dipelajar dalam ngemansangka agi Sarawak,” ku iya.

Bekaul enggau mayuh macham pemansang dalam mayuh sektor di semapur Sarawak, Abang Johari madahka iya deka madahka sekeda inisiatif maya aum Kunsil Nengeri (DUN) kena bulan November tu.

Iya madahka perintah ari baruh pegai iya deka nentuka bekal ai beresi sereta meruan disediaka di selampur Sarawak datai ba taun 2030.

“Dalam timpuh tiga taun ti deka datai, kitai deka nganti semua salur paip lama dikena nyeliahka tekeruga bekal ai laban ti tiris.

“Datai ba taun 2030, semua kandang menua di Sarawak, nyengkaum genturung pendiau di kandang menua pesisir, deka bisi akses ngagai sistem grid,” ku iya.

Naka diatu, Abang Johari madahka Sarawak udah meda pengawa ngaga jalai tebing tasik besai sereta 17 jematan besai, nyengkaum Jematan Batang Lupar ti ngena ungkus RM1 bilion enggau Jematan Batang Lupar 2 beungkus RM300 juta, enggau tuju ngangkatka tikas penyambung, ari Tanjong Datu nyentuk ke Lawas.

“Dikena nambahmanah agi tikas penyambung, kitai ngembuan jalai baru ti deka nyambung Gedong enggau Simunjan tu terus, iya nya pelilih menua ti berimbai.

“Akses baru tu deka ngangkatka kaul entara Gedong enggau Simunjan,” ku iya.

Sama bisi datai maya pengerami tu iya nya Sekretari Perintah Sarawak Datuk Amar Mohamad Abu Bakar Marzuki, Ketuai Sekretari Politik Premier Sarawak, Dato Fazzrudin Abdul Rahman, Kaban Parlimen Batang Sadong Rodiyah Sapiee, Residen Bagi Menua Samarahan Mohamad Irwan Bahari enggau temuai dipebasa ke bukai.