Inovasyen Enggau Integriti Pugu Tanah Sarawak Tegap
Posted on 23 Aug 2025
Source of News: UKAS Sarawak
KUCHING: Inovasyen enggau integriti diangkat nyadi dua pugu negapka pengawa ngatur tanah ba Sarawak setipak enggau juluk perintah ngemansangka nengeri tu nyadi siti kandang menua maju enggau bepenatai pemisi tinggi manggai 2030.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah ke kededua pekara nya baka sayap ti deka ngangkatka Opis Tanah enggau Survei (JTS) ngagai tikas tinggi agi dikena nyukung agenda pemansang nengeri.
“Inovasyen nentuka kitai seruran nyingkang ke mua enggau chara mutar baru ti kreatif enggau nemban, seraya integriti nentuka tetiap pengawa ti diadu kitai belalauka prinsip pengelurus, asi enggau ulih dikeandal,” ku iya.
Iya nyebut jaku nya nengah teks jaku dibacha Sapit Premier Sarawak ti mega Menteri Pengeraja Asal enggau Pemansang Mengeri (MUDeNR) Datuk Amar Awang Tengah Ali Hasan ba pengawa bejadi nutup Hari Inovasyen enggau Integriti Tanah enggau Survei Sarawak 2025 ba siti hotel, ditu kena Hari Lima.
Premier Sarawak mega madah ke diri temegah meda pemujur program nyukat tanah ngena Seksyen 6 Kanun Tanah, ke alai lebih 1.2 juta hektar tanah udah disukat enggau lebih 900,000 hektar ari nya udah digazet.
Pengawa nya, ku iya, mandangka pengeransing JTS nyaga hak rayat, kelebih agi bekaul hak tanah Adat Bansa Asal (NCR), ti diatu bela diberi perati ari pengawa meri surat pala tanah.
Premier Sarawak mega madah ke pengawa negapka budaya inovasyen ba staf perintan patut terus dipejalai, seraya nentuka tetiap inovasyen diadu enggau penuh tanggungpengawa enggau akauntabiliti.
Perati diberi ngagai dokumentasyen ti nyata sereta neritka undang-undang ti asi nyadi pekara beguna endar dikena nyamin pengandal semua raban, ku iya.
Sama datai, Sapit Menteri Perambu Mengeri, Pengatur Tanah enggau Rampa Menua
Datuk Len Talif Salleh, Sapit Menteri ba Opis Premier Sarawak (Integriti enggau Ombudsman) Datuk Dr. Juanda Jaya enggau Direktor JTS Sarawak Awang Zamnhari Awang Mahmood.-EDISI UKAS
