Dr Rayong (duduk, dua ari kiba) begambar bebala mayuh enggau peranak rumah panjai ti ngulu Program Randau Nyukat Tanah Temuda Bansa Asal (NCR), kemari.

BETONG: Peranak lebih agi dalam Kunsil Nengeri (DUN) Engkilili diperansang terus meri kerejasama ngagai pengawa nyukat Tanah Hak Adat Bumiputera (NCR) ti dipejalai Opis Tanah enggau Survei (JTS).

Kaban Kunsil Nengeri (ADUN) Engkilili, Dr Johnical Rayong Ngipa madahka, program nya inisiatif perintah nengeri kena ngemudahka proses nyurat tauka dokumentasyen enggau pengempu tanah jemah ila.

"Aku chukup andalka peranak, lebih agi pengempu tanah NCR ba DUN Engkilili, ngambika meri kerejasama penuh ngagai JTS ti bejalaika pengawa nyukat tanah.

"Program tu asil pengawa manah perintah ti deka ngenukuka pemansang ulih terus dipejalaika ba tanah NCR ba kandang menua tu amat nyadi jemah ila," ku iya.

Iya madahka pekara nya lebuh bejaku ba Program Randau Nyukat Tanah Temuda Bansa Asal (NCR) ba Kandang Menua Duri Bangat, Bukong, Aur Bangat, Isu Bangat, Pitoh, Pelasok, Enteban, Pais enggau Lipat dalam pelilih Menua Betong, ti diatur ba Rumah Panjai Tawie Ragai, Duri Bangat ditu, kemari.

Berebak enggau tu iya madahka, pengempu tanah ti udah bulih surat pala tanah ari baruh Seksyen 18 Kanun Tanah Negeri (KTN) mega udah ulih sepeneka ati diri ngemansangka tanah diri empu.

"Sida enda patut irau kena keruga orang ti nyakal hak sida ngempu tanah nya," ku iya.

Ke rikot, bisi 1,924 hektar tanah ba kandang endur Duri Bangat, Bukong, Aur Bangat, Isu Bangat, Pitoh, Pelasok, Enteban, Pais enggau Lipat udah dikemendarka nyukat perimeter ari baruh Seksyen 6 KTN.

Kelimpah ari nya, serata Bagi Menua Betong, naka 30 April 2025, bisi 5,775 lot tanah udah disukat ari baruh Seksyen 18 KTN nengah program Inisiatif Baru NCR, ti mungkur 7,379,7313 hektar pemesai.

Sama bisi datai ba program tu, Juru Ukur JTS Bagi Menua Betong, Clarence Christopher; Penghulu Kandang Menua Lidong, Neilson Bangga Megong, Penghulu Kandang Menua Hilir Skrang, Apo Latiti sereta sida ti bukai.