NYULUT BESAI… Hii (tengah) begambar ungkup kenang enggau raban JTS Sarawak rambau MTE 2025 ditu, empai lama

KUALA LUMPUR: Opis Tanah enggau Survei (JTS) Sarawak nyulut pengudah bulih tiga anugerah emas enggau siti pirak ungkup kategori Inovasyen Servis Perintah Asia (PSIA) di Ekspo Teknologi Malaysia (MTE) 2025 di Palan Dagang Dunya, Kuala Lumpur kena 21 Februari tu tadi.

JTS ba sebengkah penerang madah, anugerah emas nya diulih sida nengah projek inovasyen Smart Patrol ari JTS Mukah, Retrace ari JTS Sri Aman enggau i-Telcos (Intelligent Aplication of Telecommunication Tower System) ari JTS Samarahan.

“Nambah ke nya, inovasyen SARCOM (Sarawak Control Monument) ari JTS Kapit bulih anugerah pirak.

“Pekara ti balat ngemegah, keempat projek inovasyen JTS Sarawak nya diaku khas di renggat antarabansa,” ku penerang nya.

Penerang nya madah, projek i-Telcos bulih Anugerah Khas ari Haller Pro Invention Foundation, Poland.

“Seraya nya, SARCOM diaku Toronto International Society of Innovation and Advanced Skills (TISIAS), Kanada.

“Retrace nerima Anugerah Khas ari Gerempung Reta Intektual Jipun (JIPA), Jipun lalu Smart Patrol nerima anugerah Gerempung Penengkebang Besai Antarabansa (IFIA),” tampung penerang nya.