KUCHING: Semua peminta lot tanah endur diau di nengeri tu semina ulih dipinta ngena chara online nengah platform e-LASIS enggau ukai ngena pom sechara manual.

Opis Tanah enggau Survei (JTS) Sarawak nengah penerang berita nangkan mensia mayuh ngambika enda mudah kena tipu enggau servis peminta tanah lot ti disediaka orang ketiga.

JTS ngingatka pekara nya berindik ari bisi nemu aktiviti servis peminta lot tanah ti disediaka nengah platform media sosial kena 8 Januari 2025, ti dipejalaika sekeda individu.

"Ke penerang semua, JTS enda kala nyirika individu, agen tauka orang ketiga ba pengawa ngurus peminta lot tanah.

"Peminta lot tanah endur diau semina ulih dipejalaika sechara online nengah e-LASIS enggau nadai ngena pom sechara manual.

"Lalu peminta tanah ungkup tuju ti bukai, JTS bisi nyediaka pom ti ulih diambi sechara enda bebayar ari website opis.

"Mensia mayuh dilalau terus betanya ngagai enda ngira dini opis JTS ti semak nyema deka minta tanah lot endur diau tauka keguna ti bukai," ku JTS.

Berebak enggau tu JTS ngelalau mensia mayuh nyema bisi tetemuka orang bukai nyediaka servis nya patut madah ngagai sida iya.

"Nyema bisi aktiviti ti nyediaka servis baka tu, mensia mayuh ditangkan betanya terus ngagai opis JTS ti semak tauka email ngagai landsurvey@sarawak.gov.my," ku JTS.