Abdul Karim (tengah) nyuaka surat hak ngempu tanah ngagai siku ari pengempu tanah, seraya dikemataka (ari kiba) Mohamad Irwan, Mohammad Zunica enggau Abdullah Julaihi.

KOTA SAMARAHAN: Program nyukat tanah Hak Adat Bumiputera (NCR) chara kritikal tauka pemadu beguna kena pengempu tanah ngulihka hak ngempu tanah nya enggau sah.

Sapit Premier Sarawak, Datuk Amar Awang Tengah Ali Hasan madah hak ngempu tanah ba raban bansa Bumiputera di Sarawak chukup besai reti lebih agi ari baruh program inisiatif NCR baru.

Berindik ari pekara nya ku iya, kenyau ari taun 2010 program nyukat tanah NCR dipejalaika nyentuk diatu, ti dipejalaika dalam dua fasa iya nya fasa keterubah, nyukat perimeter enggau ngazet tanh ari baruh Seksyen 6 Kanun Tanah Sarawak, sereta fasa kedua, fokus ngagai pengawa nyukat lot individu enggau ngeluarka surat hak ngempu tanah ari baruh Seksyen 18.

"Program nyukat tanah NCR iya nya chara kritikal kena ngulihka hak ngempu tanah ti sah ba rayat kitai.

"Kenyau ari taun 2010, lebih 1.1 juta hektar tanah NCR udah disukat, enggau sehari tu kitai ulih meda asil nya," ku iya.

Menteri Pemansang Mengeri enggau Pengeraja Asal Kedua nya madahka pekara nya dalam teks jaku iya ti dibacha Menteri Dagang Temuai, Industri Kreatif enggau Seni Pemerindang, Dato Sri Abdul Karim Rahman Hamzah, ensanus.

Awang Tengah diarika Abdul Karim nyuaka surat hak ngempu tanah enggau chek pampas ngagai 296 pengempu tanah enggau 164 individu ba Bagi Menua Samarahan ti nerima surat ngempu tanah enggau chek pampas sepenyampau RM19.28 juta, ba pengerami ti diatur ba Institut Tadbiran Awam Negara (INTAN) Kampus Sarawak.

Kelimpah ari nya, Penguasa Tanah enggau Survei Bagi Menua Samarahan, Mohammad Zunica Mohamad Sapi’ee beterima kasih ke kerejasama semua opis enggau raban bansa ti sama ngemujurka pengerami nya.

Iya madahka, pengerami nya amat beguna dalam Program Inisiatif NCR baru ti benung dipejalaika pengawa nyukat enggau ngazet tanah NCR.

Ba pengerami tu bisi nyuaka surat hak ngempu tanah ari baruh Seksyen 13 enggau 18 Kanun Tanah Sarawak ngagai pengempu tanah ba Kampung Entingan, Kampung Nangka, Kampung Mang di N.16 Muara Tuang enggau Kampung Sri Tajo di N.15 Asajaya.

Bisi 173 surat ngempu tanah disuaka, ti mungkur urung 452.33 hektar (1,116.33 ekar) tanah.

Ditambah ngagai pengempu tanah, chek pampas udah diberi ngagai sida ti bekaul enggau dua projek serantau besai.

Skim Nangkir Genturung Pendiau (SPK) Beliong, dikemansangka kena mutarka penyekut ba tumpuk pendiau nya, ti bisi 21 penerima nerima chek pampas sepenyampau RM2.74 juta.

Kelimpah ari nya, Projek Pengukuhan Rangkaian Kuching 275KV, pemansang infrastruktur beguna, nyediaka pampas RM16.5 juta ngagai 143 penerima.

Pengerami nya kelai ti chukup besai reti dalam pemansang enggau pengelantang raban bansa Bagi Menua Samarahan, ngenegapka agi komitmen perintah ti nyukung penumbuh wilayah enggau ngemanahka agi tikas pengidup rayat.

Sama bisi datai, Sekretari Mendam Opis Menteri Pengeraja Asal enggau Pemansang Mengeri Datu Abdullah Julaihi enggau Residen Kota Samarahan Mohamad Irwan Bahari Bujang.