Abang Johari lebuh ti nyain digital ungkup Pengerami Ngintu Ke-20 Taun Bup Lembaga Juruukur Tanah Sarawak di Kuching, kena malam Hari Satu nyin tadi. - Gambar UKAS

KUCHING: Bisi guna ti ngansak dalam meretika bagi kandang endur ke engkeman dalam pelantar ba Sarawak kelebih agi palan telaga minyak ke suba ti nyadi palan endur nyimpan karbon, ku Premier Sarawak Datuk Patinggi Tan Sri Abang Johari Tun Openg.

Jaku iya tu diambi nengah ripot Unit Komunikasyen Perintah Sarawak (UKAS) ti ngemeratka guna bejalaika pansik tasik dalam nemu bagi palan ti bisi potensyel ungkup nyimpan karbon sereta pemisi bukai ti tinggi rega.

“Dikena ngatur pengawa nyimpan karbon enggau manah kitai mesti matau dalam tasik kitai enggau betul lalu meda palan khas ke begunaka teknologi ti pemadu baru.

“Dalam pekara tu, aku udah minta Opis Tanah enggau Survei (JTS) ngambika bekerejasama enggau Universiti Teknologi Malaysia.

“Kitai udah ngagihka RM5 juta ngagai universiti ungkup pengawa mansik enggau ngelatih juruukur ti kompeten dalam pansik dalam tasik,” ku iya.

Iya madah munyi tu maya pengerami Makai Lemai Ngintu Ke-20 Taun Lembaga Juruukur Tanah Sarawak ditu, malam Hari Satu.

Abang Johari madah, pengelandik ti dikemansangka nengah inisiatif tu dipelabaka deka bejalaika pangkupengawa ti beguna dalam projek pemeruan rampa menua Sarawak.

Nitih ku iya, Sarawak chukup betuah udah nemu bagi kandang endur ti nangkup kriteria dalam pengawa nyimpan karbon ti engkeman.

Bekaul enggau pengawa betanam betupi, Abang Johari ngemeratka guna ubah polisi kelebih agi bekaul enggau sawit.

Ku iya, mayuh bekau ti ulih nyadi aktiviti ekonomi, nyengkaum ngemansutka baja sereta pelet kayu, ke ulih nyadi pemisi biomas dalam ngemansutka energi.

Berindik ari tu, ku iya nambah tuju tu iya nya sepenyampau RM5 juta udah diagihka ungkup pengawa mansik begulai enggau Ta Ann Holdings Berhad enggau tambah RM5 juta khas ungkup Universiti Teknologi Swinburne Sarawak.

Ba pengerami ti sama, Premier Sarawak udah madahka pemendar ungkup sebidang tanah ungkup Lembaga Juruukur Tanah Sarawak beserimbai enggau ngintu ke-20 taun tu ditumbuhka.

Iya mega udah bejadika Sistem e-LSBS ungkup opis tu lalu nyain Bup Ngintu Ke-20 Taun, 'A Journey Down Memory Lane'.

Sama bisi datai Sapit Menteri Perambu Mengeri, Pengawa Ngatur Tanah enggau Rampa Menua Datu Len Talif Salleh; Sekretari Mendam Opis Menteri Pengeraja Asal enggau Pemansang Mengeri Datu Abdullah Julaihi; Chairman Lembaga Juruukur Tanah Berlesen Sarawak (ALCS) Datu Dr Sudarsono Osman; Menijer Besai Lembaga Pembangunan dan Pemuliharaan Tanah (LCDA) Datu Sr Zaidi Mahdi enggau temuai dipebasa ke bukai.