KUCHING: Perintah Sarawak meri RM5 juta ngagai Universiti Teknologi Malaysia (UTM) ungkup tuju pemansang enggau pansik (R&D) nengah program kerejasama Makmal Satelit Opis Tanah enggau Survei (JTS) Sarawak-UTM.

R&D nya bekaul ekonomi gadung, pengawa ngeluyang, geospatial, ‘Remote Sensing’, Marin Kadestra, ubah klimet, perambu mengeri enggau wilayah, mutar penusah ngenyit, teknologi membran enggau sektor bukai.

“Semua tungkap tu khas ungkup Sarawak lalu disadang deka meri penemu pemadu manah ngemujur Strategi Pemansang Pengudah COVID-19 (PCDS) 2030,” ku penerang JTS.

Pengawa nyuaka chek replika penyampau RM5 juta nya udah dipenyadi Sekretari Mendam Opis Menteri Pengeraja Asal enggau Pemansang Mengeri Sarawak, Datu Abdullah Julaihi ngagai Mandal Chanselor UTM, Prof. Datuk Ahmad Fauzi Ismail lalu dikemata Kebawah Duli Yang Maha Mulia Seri Paduka Baginda Raja Permaisuri Agong, Raja Zarith Sofiah ke mega Chanselor UTM serimbai Pengerami Santapan Diraja di Marriot Hotel, Putrajaya.

Pengerami nya mega digulu Pro Chanselor UTM, Che’ Puan Mahkota Khaleeda Johor, Tuai Sekretari Opis Menteri Pelajar Tinggi, Dato’ Seri Ir. Dr. Zaini Ujang, Mandal Chanselor UTM Prof. Datuk Dr Ahmad Fauzi Ismail, Chairman Kaunsil UTM Tan Sri Azman Mokhtar sereta Direktor Opis Tanah enggau Survei Sarawak Awang Zamhari Awang Mahmood.

Pengerami nya udah ngerami 39 ejensi ari perintah nengeri, kaunsil profesional, industri, gerempung alumni, institusyen bank enggau kaunsil komersial UTM ti udah nambah sepanjai taun 2024.

Asil digumpul nengah pelasar tu ngerikod RM6.4 juta.