78 Kontinjen Ngambi Bagi Ba Pembarisan & Rapat Raksasa Serimbai Hari Pengada Yang di-Pertua Negeri Sarawak
Posted on 14 Oct 2024
Source of News: UKAS Sarawak
KUCHING: Beserimbai enggau hari pengada Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar, Istiadat Perbarisan Enggau Rapat Raksasa di Padang Merdeka Kuching udah dipasuk 78 kontinjen.
Lebih 3,000 penyereta ari Opis Menteri, opis, ejensi, badan berkanun, gerempung, serakup enggau peribit ke bisi ngambi bagi ba program tu berengkah urung pukul 7 pagi.
Tun Pehin Sri Dr Wan Junaidi udah ngaga lintas basa ngena perengka pengangkut khas, disempulang Premier Sarawak, Datuk Patinggi Tan Sri (Dr) Abang Abdul Rahman Zohari.
Pengerami nya mega udah mantaika jaku selamat hari pengada beserimbai enggau hari pengada iya sereta pengarap iya nyadi tuai, kelimpah mandangka pemerindang main asal enggau tanda.
Tun Pehin Sri Dr Wan Junaidi enggau bini, Toh Puan Fauziah mega udah nyirap kek lalu digulu enggau panjung ‘Dirgahayu’ ari bala kontinjen.
Video ti besuluka jaku ‘Aspirasi Rayat’ mega bisi dipandang ngagai Tun Pehin Sri Dr Wan Junaidi ke mantaika jaku selamat ngintu hari pengada sereta pengarap pemerintah ngagai iya ke nyadi Yang di-Pertua Negeri Sarawak.
Pengawa nya mega bisi mandangka pemerindang main asal enggau tanda sereta diperindang penanyi tebilang Sarawak, Bob Yusof enggau Dayang Nurfaizah.
Berebak enggau nya, pengerami nutup nya bela ngemata pengawa nyuaka perais ngagai sekeda kontinjen pemadu manah ti dipenyadika Sapit Menteri Nembiak, Lumba enggau Pemansang Orang Dagang Sarawak Dato Gerald Rentap Jabu sereta Sapit Menteri Kuasa enggau Pemeruan Rampa Menua Sarawak Datuk Dr Hazland Abang Hipni.
Champion ba semua kategori udah dipenggi kontinjen Opis Tanah Enggau Survei Sarawak mujur mai pulai perais mata duit sepenyampau RM2,000.
Kelimpah ari nya, ungkup tiap kategori, Opis Tanah enggau Survei sekali agi mujur bulih gelar champion ungkup kategori Kontinjen Penerit Adat dientudika Kontinjen Gerempung enggau Etnik ti mujur diempu Amanat Khairat Yayasan Budaya Melayu Sarawak.
Nangkan nya, Kategori Kontinjen Gerempung Ukai Dikuasa Perintah/Peribit udah diempu Kaunsil Pemansang Bintulu dientudi kategori Kontinjen Opis Menteri ke diempu Opis Menteri Pengeraja Asal enggau Pemansang Mengeri lalu kategori Kontinjen Opis Pengatur Pengawa diempu Opis Pengatur Pengawa Bagi Menua Bintulu.
Semua pemenang deka mai pulai perais mata duit sepenyampau RM3,000 sereta trofi.
Sama datai iya nya Sapit Premier Sarawak Datuk Amar Douglas Uggah Embas, Datuk Amar Awang Tengah Ali Hasan enggau Datuk Amar Profesor Dr. Sim Kui Hian, Menteri Nembiak, Lumba enggau Pemansang Orang Dagang Sarawak ke mega Menteri ke megai Tanggungpengawa, Dato Sri Abdul Karim Rahman Hamzah, baris Menteri Kabinet Sarawak, Sekretari Perintah Sarawak Datuk Amar Mohamad Abu Bakar Marzuki, Sapit Menteri Kabinet Sarawak sereta temuai dipebasa ke bukai.-EDISI UKAS
