KUCHING: Program Minggu Informasyen Geo 2024 ulih mantu ngemanahka agi perambu pemansang infrastruktur mengeri enggau menua pesisir.

Sapit Premier Sarawak, Datuk Amar Awang Tengah Ali Hasan madah, nya seraris enggau misyen Sarawak ba pengawa nentu pejalai pemansang sebela ungkup kededua sitak nya.

“Takah entara mengeri enggau menua pesisir meri pemar tang tu nyendia peluang teknologi geospatial ungkup semua.

“Nengah inisiatif ngemanahka agi perambu enggau infrastruktur mengeri sereta ngena penuh tanah di menua pesisir, sistem informasyen geo meri pemaik ngagai kitai ngaga pemutus nemban ungkup pemansang meruan,” ku iya.

Awang Tengah mansutka jaku nya pengudah diarika Sapit Menteri Perambu Mengeri, Pengatur Tanah enggau Rampa Menua, Datuk Len Talif Salleh ba Pengerami Makai Lemai Aum Antarabansa Begulai Minggu Informasyen Geo 2024 ba sebuah hotel ditu, malam ensanus.

Ku iya, sulu jaku ‘Inovasyen Geospatial ungkup pemansang menua pesisir enggau pemeruan mengeri’ ungkup aum nya dipilih seraris enggau misyen aum nya empu.

Iya nyemetak madah, inisiatif nya mega nyadi inisiatif numbuhka pemansang dikena mutar penanggul ba mengeri enggau menua pesisir.