Projek Infrastruktur Pulau Bruit Dirumban
Posted on 15 Sep 2024
Source of News: UKAS Sarawak
SEMOP: Baka panchar penampak ba ujung jalai, peranak Pulai Bruit deka ngasaika bekal ai ti chukup enggau bekualiti berindik ari projek baru ti deka dipejalaika Perintah Sarawak.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, nya mungkur pengawa mekal ai 5 Juta Liter Sehari (MLD) ngagai pulau nya, ti beungkus ngelui ari RM60 juta.
Ku iya, projek nya disadang tembu ujung taun tu.
“Ngarapka ujung taun tu, kitai ulih bejadika 5 juta MLD ai ti disambung kitai di Pulau Bruit tu,” ku iya madah maya bejadika Pengerami Pulai Bruit di Taba Rural Growth Centre (RGC) Semop, Hari Enam.
Ba jaku ke sama, Datuk Patinggi Abang Zohari udah ngemendarka 56 blok skim berumah baru di Pulai Bruit enggau ungkus RM4.5 juta deka dipelanja perintah Gabungan Parti Sarawak (GPS).
“Rumah ke deka digaga kitai baka Kampung Dato tauka Kemuyang di Sibu, enti ba Kuching, baka perumahan di Sungai Bedaun.
“Deposit RM10,000 GPS mayar, tang ke bukai kita empu mayar.
“Kitai deka nambah agi enti nyema agi diguna, laban aku chukup andal, dudi hari ila Sarawak majak manah,” ku iya nambah.
Berebak enggau nya, agih belanja sepenyampau RM5 juta udah dikemendarka ungkup ngaga Pasar Tani enggau Medan Selera di Pulai Bruit, nyengkaum RM5.6 juta ungkup Opis Komiti Pemansang enggau Ngintu Tanah (LCDA) dikena nyeleti rumah orang berikan.
Sama bisi datai maya nya, Sapit Menteri di Opis Premier Sarawak (Pekara Korporat, Pemadah enggau Unit Komunikasi Awam Sarawak) Datuk Abdullah Saidol, Sapit Menteri di Opis Premier Sarawak (Undang-Undang, MA63 enggau Kaul Nengeri-Perintah Besai) Datuk Sharifah Hasidah Sayeed Aman Ghazali, Sapit Menteri di Opis Premier Sarawak (Integrasyen enggau Ombudsman) Datuk Dr Juanda Jaya, Kaban Parlimen Tanjong Manis Ir Yusuf Abd Wahab, Kaban Parlimen Igan Ahmad Johnie Zawawi, Tuai Sekretari Politik Premier Sarawak Fazzrudin Abdul Rahman sereta Kaban Kunsil Nengeri (ADUN) Daro Syafiee Ahmad.-EDISI UKAS
