Abang Johari meri kelai jari manah pengudah bejadi Pesta Pulau Bruit 2024 ba Pusat Pertumbuhan Luar Bandar, Semop di Daro, kemari. - Gambar UKAS

"Ngambi ke Pulau Bruit enda agi kediri, disambung enggau Daro terus ke Mukah, disambung enggau Tanjung Manis terus ke Sibu enggau Sarikei"

Datuk Patinggi Tan Sri Abang Johari Tun Openg 
Premier Sarawak

SIBU: Pulau Bruit enda agi kediri laban deka lengkas disambung enggau kandang endur ngelingi ia penembu Jematan Batang Lassa enggau Jematan Batang Paloh.

Premier Sarawak, Datuk Patinggi Tan Sri Abang Johari Tun Openg madahka, nya pemansang ti beguna, iya nya sebagi ari pengawa ti deka dipajakka kena ngangkatka pemanah infrastruktur enggau penyambung ba kandang menua nya.

"Ba taun 2017, pengudah nyadi Kepala Menteri, aku bisi madah ngaga Jematan Batang Lassa enggau Paloh.

"Ngambi ke Pulau Bruit enda agi kediri, disambung enggau Daro terus ke Mukah, disambung enggau Tanjung Manis terus ke Sibu enggau Sarikei," ku iya.

Abang Johari madahka pekara nya lebuh bejaku ba pengerami bejadi Pesta Pulau Bruit 2024 ti diatur ba Pusat Pertumbuhan Luar Bandar, Semop di Daro, kemari.

Bejaku baru iya madahka, ngena ungkus belanja sepenyampau RM1 bilion, jematan nya deka nyapai juluk iya nyambungka Pulau Bruit ke Daro, Mukah, enggau Tanjung Manis ke Sibu enggau Sarikei.

"Juluk aku udah nyadi nyata," ku iya seraya bebendar madah ungkus belanja udah dikemendar sereta projek benung chakah digaga.
Nitih ke Abang Johari mega, Pulau Bruit udah lama betapi enggau penanggul ai.

"Kena mutarka penanggul tu, sebengkah projek benung dipejalaika kena nyendiaka 5 juta liter ai sehari ungkup peranak pulau tu lebuh datai ba ujung taun tu.

"Projek tu, ti begunaka belanja lebih RM60 juta, nyengkaum pengawa masang batang paip ai baru ke Pulau Bruit," ku iya.

Nambah nya, iya madahka ari baruh inisiatif pemansang serantau, Ejensi Pemansang Delta Rajang (RADDA) udah ditumbuhka enggau tuju penumbuh ngambi ke ulih ngemansangka kandang endur Delta Rajang, nyengkaum Mukah, Pulau Bruit, Daro, Tanjung Manis, enggau Belawai.

"Ngemanahka agi infrastruktur di Pulau Bruit endang pekara diperati enggau dikenatika," ku iya.

Kelimpah ari nya, nyerumba pengerami nya Abang Johari bisi madah ungkup belanja sepenyampau RM5.6 juta dikena ngaduka manah agi projek berumah orang berikan ba kandang menua nya, sebengkah palan betanam betupi baru enggau 'medan selera' tauka palan endur makai.

Ngenang langgur skim berumah baru, iya madahka, bisi 56 lot dikemendar dikemansangka ba Pulau Bruit, sereta pemayuh lot nya deka ditambah jemah ila bepelasarka peminta peranak ba menua nya.

Rumah nya, ku iya, digaga sebaka enggau di Kampung Dato enggau Kemunyang di Sibu, sereta Sungai Bedaun di Kuching, deka baka banglo bisi tiga bilik tinduk.

"Ungkus nyendiaka taba enggau ngaga jalai, nyengkaum deposit RM10,000 deka ditanggung perintah Sarawak," ku iya.

Sama bisi datai ngagai pengerami bejadi Pesta Pulau Bruit 2024, iya nya Sapit Menteri ba Opis Premier Sarawak, Datuk Abdullah Saidol; Kaban Parlimen Tanjung Manis, Yusuf Abdul Wahab enggau pemesai ti bukai.