Wong (dua kiba) nyuaka Sijil Penghargaan ngagai Serimah seraya diperatika Ting (kiba), Wong Hua (tiga kiba) enggau Teo (kanan)maya sesi randau enggau JTS Sibu
SIBU: Kaban Kunsil Nengeri (ADUN) Bawang Assan Dato Sri Wong Soon Koh madahka, premium tauka chukai tanah di nengeri tu enda kala diserenih tauka diperesa dalam timpuh urung 30 taun.
Nya alai ku iya, mayuh pengempu tanah engka enda nemu kandang tanah sida udah diklasifikasyen ari tanah menua pesisir nyadi kandang tanah tisi mengeri.
"Engka mega kitai patut madah ngagai semua pengempu tanah iya nya perintah enda kala nyerenih premium, chukai tauka sua tanah tu dalam timpuh urung 30 taun.
"Tu entara isu ke patut dipadah ngagai rayat lebih agi pengempu tanah bakani tanah sida diklasifikasyen enggau nama kriteria ti nyadi polisi klasifikasyen nya," ku iya.
Wong madahka pekara nya lebuh bejaku ba Pengawa Randau Pemesai Sitak Kunsil Nengeri (DUN) Bawang Asan enggau DUN Dudong begulai enggau Opis Tanah enggau Survei (JTS ti diatur Parti Demokratik Progresif (PDP) Bawang Assan ba sebengkah hotel ditu, kemari.
Mandal Presiden Kanan PDP nya madahka, apin lama sekeda pengempu tanah bisi betemu enggau pemesai sereta pengereja pengawa PDP lalu betanya pasal isu tanah, lebih agi penyampau bayar ngemaruka pajak tanah tauka sua tanah.
"Sida enda meretika nama kebuah sekeda pengempu tanah semina mayar RM200 ke tiap ekar, tang tanh ba kandang endur ti semak tauka sepiak patut mayar RM2,500 ke tiap ekar enti ngemaruka pajak tanah.
"Pekara tu entara isu ti dipinta sida diterangka JTS. Ba sekeda kandang endur baka tanah ba zon ngaga kapal, sua pajak ditiki balat amat nyentuk manggai nambah beratus peratus. Di kandang mengeri, sua pajak mega niki enggau nyata," terang iya.
Wong ngarapka randau nya ulih meri asil ngagai semua penyereta ti ngulu ti mega pemesai ba kandang endur diri empu ulih nerang sereta bekunsi semua pekara bekaul enggau tanah ngagai peranak ti ngempu tanah.
Ngena chara nya ku iya, sida lebih meretika isu enggau pekara bekaul enggau tanah, nyengkaum ngurus tanah, magi tanah enggau ti bukai.
Sama bisi datai ngulu randau nya, Sekretari Politik ngagai Premier Sarawak, Joshua Ting; Bendahari Kehormat PDP ti mega tuai PDP Dudong Datuk Teo Boon Siew; Penilai Kanan JTS Sibu Serimah Bol, chairman pengatur ti mega tuai PDP Bawang Assan Kapitan Wong Hua enggau sida ti bukai.