Sarawak Agi Diaku Nyadi Nengeri Bepenatai Pemisi Tinggi 2024
Posted on 06 Jul 2024
Source of News: UKAS Sarawak
KUCHING: Sarawak agi ngetanka status nyadi sebuah nengeri bepenatai pemisi tinggi pengudah Bank Dunya sekali agi ngenukuka pengawa ngaku nya apin lama ke udah.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, iya dipadahka Asil Kasar Dalam Menua (GNI) per kapita Sarawak niki ngagai USD17,000 enti dibanding enggau USD15,000 taun siti nyin tadi.
Ku iya, pemujur nya mandangka Sarawak udah mujur ngangkatka tikas pengidup rayat sereta nempa peluang ekonomi ke manah.
"Kemari Bank Dunya udah ngenukuka Sarawak agi nyadi nengeri bepenatai pemisi tinggi bepelasarka penambah GNI per kapita.
"Enda ulih dikeenggai isu penyeranta kitai (Sarawak) agi bisi, nya alai sekeda individu mandingka Sarawak enggau nengeri Perlis ti nadai betapi enggau isu penyeranta.
"Taja pen Sarawak bisi penatai pemisi ke tinggi, tang agi bisi 'pockets of poverty ‘, enti deka dibanding, kandang menua Perlis tu baka setengah ari Bandaraya Kuching aja, seraya kandang menua kitai ari selatan nyentuk utara aja sebaka besai enggau serata Semenanjung ,enda nyengkaum ngemanahka infrastruktur enggau pelajar.
"Uji perati enggau kandang menua ke bisi di Sarawak, berapa ungkus ke dikena?" ku iya.
Iya madah munyi nya maya bejaku bejadika Pengawa Nutup Hari Inovasyen enggau Integriti Tanah Sarawak (HIITS) 2024 berambaika jaku ‘‘Penegap Integriti Pugu Pemeruan Inovasyen’, kena Hari Lima tu tadi.
Ba pengerami nya, Datuk Patinggi Abang Zohari mega ngemata pengawa nyuaka perais ngagai sekeda projek enggau individu ti udah mandangka penyulut ba pengawa inovasyen enggau integriti.
Entara anugerah ke diberi nyengkaum Anugerah Inovasyen Transformasyen Meri Servis, Anugerah Inovasyen Sosial, Anugerah Inovasyen Pemeruan Rampa Menua, Anugerah Inovasyen Transformasyen Digital, Anugerah Khas Nyadi Tuai Inovasyen, Anugerah Montaj Pemadu Manah enggau Anugerah Pengawa Pemadu Nyulut.
Sama datai Sapit Premier Sarawak Datuk Amar Awang Tengah Ali Hasan, Sekretari Perintah Sarawak Datuk Amar Mohamad Abu Bakar Marzuki, Sapit Menteri Perambu Mengeri, Pengatur Tanah enggau Rampa Menua Sarawak Datuk Len Talif Salleh, Sapit Menteri ba Opis Premier Sarawak (Integriti enggau Ombudsman) Datuk Dr.Juanda Jaya, Sekretari Mendam Opis Menteri Pengeraja Asal enggau Pemansang Mengeri Sarawak Datu Abdullah Julaihi, Direktor JTS Sarawak Awang Zamhari Awang Mahmood enggau temuai dipebasa ke bukai.
HIITS 2024 diatur pengelama tiga hari berengkah 3 Julai lalu di Hotel Waterfront Kuching bejuraika projek inovasyen nengah Konvebsyen Tim Inovatif enggau Kreatif (KIK) Rengat JTS Sarawak.-EDISI UKAS
